KODI musadziwa kuti mbani adagona pantsi? Ndi Saulu. Kumbukani kuti iye ndi ule adaonera makapoti a amuna adaponyera miyala Setifano. Yang’anani ceza cire cakuyetima! Kodi ndi ninji cidacitika?

Mudamala kuphiwa Setifano, Saulu atsogolera kutcinga atowereri a Yezu towera kuathabusa. Iye aenda ku nyumba na nyumba mbaakwekweta mbaaponya nkaidi. Azinji a anyakupfunza athawira ku mizinda inango mbatoma kumwaza “mphangwa zadidi” kweneko. Mbwenye Saulu aenda ku mizinda inango towera akagumane atowereri a Yezu. Muyang’aneni mbakaenda ku Damasiku. Mbwenye, m’njira, mwacitika cinthu ici cakudzumatirisa:

Mwakudzidzimusa ceza cakubulukira kudzulu cayetima nkhundunkhundu mwa Saulu. Iye agwa pantsi, ninga munaonefe pano. Buluka penepo fala yalonga: ‘Saulu, Saulu! Thangwi yanji iwe usandithabusa?’ Amuna akakhala na Saulu aona ceza na abva dzumbi ya fala, mbwenye hadakwanisa kubvesesa pikhalongwa tayu.

Saulu abvunza: ‘Kodi ndimwe ani, Mbuya?’

Fala yalonga: ‘Ndine Yezu, ule anathabusa iwe.’ Yezu alonga pyenepi thangwi mukathabusa Saulu atowereri a Yezu, Yezu akhabva ninga iye ene akhathabuswa.

Mphapo Saulu abvunza: ‘Ndisafunika kucitanji, Mbuya?’

Yezu alonga: ‘Lamuka uende ku Damasiku. Kweneko unadzapangwa pinafuna iwe kucita.’ Mudalamuka Saulu mbafungula maso ace, nee akwanisa kuona cinthu. Iye akhali boliboli! Natenepa amuna akakhala na iye amphata na dzanja mbantsogolera ku Damasiku.

Mphapo Yezu alonga kwa mbodzi wa anyakupfunzace m’Damasiku, mbati: ‘Ananiya, Lamuka. Ndoko ku nseu unacemerwa Wakulungama. Saka ku nyumba ya Yudasi mamuna anacemerwa Saulu. Ndansankhula kuti akhale nzakazi wanga wakupambulika.’

Ananiya abvera. Mudagumana iye Saulu, Ananiya aikha manjace padzulu pa Saulu mbalonga: ‘Mbuya andituma towera iwe ukwanise kuona pontho na udzale na nzimu wakucena.’ M’nzidzi uneule pinthu pyakulandana na makoko pyagwa kubuluka m’maso a Saulu, na iye akwanisa kuona pontho.

Saulu aphatisirwa basa m’njira yamphambvu towera kumwaza mphangwa kwa anthu amadziko mazinji. Iye adzakhala wakudziwika ninga mpostolo Paulu, wakuti tinadzapfunza pizinji kakamwe pya iye. Mbwenye pakutoma, tendeni tione pidatuma Mulungu Pedru kuti acite.