¿WAN maʼ xa naʼa machunkiluk ja winik mokʼel bʼa luʼumi? Yeʼna Saulo, ja it maʼ kan stalnay ja spal kʼu ja matik xchʼojowe ton ja Estebani. ¡Kʼela ja ijlabʼ xlijpixtaʼi! ¿Jasa wan ekʼeli?

Tsaʼan ja cham ja Estebani, ja Saulo wani slejel ekʼ spetsanil ja snochuman ja Jesusi bʼa oj yaʼ yile wokol. Wa xchʼika sbʼaj bʼa yoj naʼitsaltik sok wa xya eluke ja bʼa snajeʼi sok wa xchʼika preso. Jitsan ja bʼa nebʼumaniki wa spakawe ajnel bʼa pilan chonabʼik sok ti wa xcholowe tiw ja «lekil rasoni». Pe ja Saulo wa xwaj bʼa tuktukil chonabʼ bʼa oj sleʼ ja snochumanik ja Jesusi. Ja weʼgo ti wajum bʼa Damasco. Pe ja bʼa bʼeji ekʼ ja jasunuk it jel chamyiljeli.

Jastal ni waxa wila bʼa dibujo, junta chʼaykʼujol ja bʼa satkʼinali koʼ jun ijlabʼ sok smusuʼel ja Saulo, soka it man luʼum mokʼi. Anto jun kʼumal yala: «¡Saulo, Saulo! ¿Jas yuj waxa wixtalaʼanoni?». Ja winike matik teysmok ja Saulo yilawe ja ijlabʼi sok yabʼye ja kʼumali, pe mi yabʼye stojolil.

«¿Machʼaya, Kajwal?», xchi ja Saulo.

«Keʼna Jesús, ja maʼ ixta waxa wila», xchi ja kʼumali. Yajni ja Saulo wa xyixtalaʼan ja nebʼumaniki, jachʼ jastal yeʼn wan kʼulajel yi ja Jesusi. Jaʼ yuj jachʼ yala yabʼ ja Saulo.

Tixa sjobʼo ja Saulo: «¿Kajwal, jasunkʼa waxa kʼana oj jkʼuluki?».

Ti yala ja Jesús: «Kʼeʼan sok kaʼax bʼa Damasco. Ti tiw oj aljukawabʼ ja jasa oj akʼuluki». Yajni ja Saulo stulusbʼaj sok spitsa ja sati, ¡mi xyila kʼinal! Ja yuj ja winike smoji xchechawe och man Damasco.

Ja Jesús ti skʼuman jun nebʼuman ja bʼa Damasco sok yala yab: «Ananías, kʼeʼan. Kaʼax ja bʼa bʼej Tojxtaʼi. Ja bʼa snaj Judas jobʼo yabʼalil jun winik sbʼiʼil Saulo. Tsaʼubʼal xa kuj bʼa oj och jun kaʼtijum jel tʼilan».

Ja Ananiasi skʼuʼaniʼa. Yajni skʼela ja Saulo, ti syamaʼa sok yala yabʼ: «Ja Kajwaltiki sjekawon jani bʼa oj awil kʼinal yajkʼachil ekʼele sok bʼa oj koʼabʼaj ja yip ja Dyosi». Anto lajansok skajlabʼil pat chay lujbʼaji ja bʼa sat ja Saulo, sok cha jamxi ja sati.

Ja Saulo jelni makuniʼa soka aʼtel bʼa xcholjel bʼa jitsan chonabʼiki. Kʼot najuk sbʼaj jastal jekabʼanum Pablo, sok jelto jas oj jnebʼtik bʼa yeʼna. Pe bʼajtan la kiltik jas yala ja Dyosi oj skʼuluk ja Pedro.