STORI 108
Long Rot i Go Long Damaskus
YU SAVE dispela man i slip long graun em i husat? Em Sol. Em dispela man i bin holim ol saket bilong ol man i tromoi ston long Stiven. Lukim dispela bikpela lait! Wanem samting i kamap?
Taim ol i kilim i dai Stiven pinis, Sol i go pas long bagarapim ol disaipel bilong Jisas. Em i go long haus bilong ol na kisim ol na putim ol long kalabus. Planti disaipel i ranawe i go long ol narapela taun na ol i autim “gutnius” long ol dispela hap. Tasol Sol i go painim ol dispela disaipel bilong Jisas. Nau em i laik go long Damaskus. Tasol taim em i wokabaut yet long rot, wanpela narapela kain samting i kamap, olsem:
Wantu lait i kam long heven na i sutim Sol. Em i pundaun long graun, olsem yumi lukim long piksa. Nau wanpela maus i tok: ‘Sol, Sol! Bilong wanem yu wok long bagarapim mi?’ Ol man i stap wantaim Sol ol i lukim lait na harim maus, tasol ol i no save dispela maus i tok wanem.
Sol i tok: ‘Bikpela, yu husat?’
Maus i tok: ‘Mi Jisas, em yu wok long bagarapim mi.’ Jisas i tok olsem, long wanem, taim Sol i wok long bagarapim ol disaipel bilong Jisas, i olsem Sol i bagarapim Jisas yet.
Nau Sol i tok: ‘Bikpela, mi mas mekim wanem?’
Jisas i tok: ‘Yu kirap na go long Damaskus. Wanpela man bai tokim yu long ol samting yu mas mekim.’ Sol i kirap sanap, tasol taim em i opim ai, em i no inap lukluk. Em i aipas! Olsem na ol man i stap wantaim em ol i holim han bilong em na kisim em i go long Damaskus.
Orait Jisas i toktok long wanpela disaipel long Damaskus, na em i tok: ‘Ananaias, yu kirap na yu go long dispela rot nem bilong em Stretpela. Long haus bilong Judas yu mas askim long wanpela man nem bilong em Sol. Mi makim em bilong mekim wok bilong mi.’
Ananaias i bihainim tok. Taim em i bungim Sol, em i putim han antap long Sol na em i tok: ‘Bikpela i salim mi i kam na bai yu inap lukluk gen na holi spirit i ken pulap long yu.’ Orait wantu, samting olsem grile bilong pis i lusim ai bilong Sol, na em inap lukluk gen.
Sol i mekim bikpela wok bilong autim tok long ol man bilong planti lain. Em i kamap aposel Pol. Bihain bai yumi stori moa long em. Tasol pastaim yumi ken stori long wok God i bin salim Pita long mekim.
