NOMANYA ogu anyakubyamire hansi? Nuwe Saulo. Ijuka ngu nuwe yalinzire eminagiro y’abasaija abatire Sitefano amabale. Dora ekyererezi eky’amaani! Kiki ekibaireho hati?

Hanyuma y’okwitwa kwa Sitefano, Saulo akebembera abakaba nibaserra abegeswa ba Yesu kubakora kubi. Yagendaga nju ha nju nabasikamburamu nabatwara mu nkomo. Baingi ha begeswa ba Yesu bakairuka bagenda mubibuga bindi kandi batandika kutebeza ‘amakuru amarungi’ oku. Baitu Saulo yagenda omubibuga ebindi kuserra abegeswa ba Yesu. Hati ali mu muhanda nagenda Damasiko. Baitu obu akaba akyali mumuhanda, kinu ekintu ekikuhuniriza kikabaho:

Ahonaho, ekimyanso kuruga haiguru kyehinguliriza Saulo. Agwa hansi nkoku turukurora hanu. Hanyuma nubwo iraka lyagamba: ‘Saulo, Saulo! Nompiganira ki?’ Abasaija abakaba na Saulo bakarora ekyererezi kandi bakahurra okugamba kwiraka, baitu batasobole kwetegereza ebikaba nibigambwa.

‘Niwoha Mukama, wange?’ Saulo yakaguza.

‘Ninyowe Yesu ow’orukuhiganiza,’ Iraka liba nikwo lyagamba. Yesu agamba ngu Saulo obu ahiganiza abakurasi ba Yesu, aba nahiganiza Yesu wonyini.

Saulo hati akaguza: ‘Nkoleki, Mukama wange?’

Yesu amugambira ati: ‘Imuka, ogende otaahe mu Damasiko, oku oragambirwa ekyokukora.’ Saulo obu yaimukire kandi yagonza kurora, atasobole kurora kintu kyoona. Hati kihimbaara! Nubwo abasaija abakaba bali nawe bamukwata ha mukono kandi bamutahya mu Damasiko.

Yesu hati yagambira omu ha bakurasi be mu Damasiko ati: ‘Imuka Ananiya. Genda omu muhanda ogw’orubuga ogurukwetwa Literekirire. Hanju ya Yuda okaguze omusaija arukwetwa Saulo. Mukomere okuba omuhereza wange ow’embaganiza.’

Ananiya aikiriza. Obu yatangaine Saulo, yamutaho engaro kandi yagamba: ‘Mukama antumire nukwo osobole kugaruka kurora kandi oijuzibwe omwoyo ogurukwera.’ Aho naho ebintu ebikusisana nk’ebikoko byaragara kuruga ha maiso ga Saulo, kandi yasobora kugaruka kurora.

Saulo yakozesebwa mumulingo ogw’embaganiza kutebeza abantu ab’amahanga maingi. Akamanywa nk’omukwenda Paulo ou turukwija kwegaho bingi. Baitu katubanze twetegereze Ruhanga eki yatumire Petero kukora.