MAARAM ka ba kon hin-o ini nga lalaki nga natumba? Hiya hi Saulo. Hinumdumi, hiya an nagbantay han panggawas nga mga bado han kalalakin-an nga nagbato kan Esteban. Kitaa an duro nga kalamrag! Ano an nahitatabo?

Katapos patayon hi Esteban, hi Saulo an nanguna ha pagbiling ha mga sumurunod ni Jesus basi pagtimarauton hira. Sinulod hiya ha ira mga balay, gindanas hira tipagawas, ngan ginpriso hira. Damu han mga disipulo an namalagiw ngadto ha iba nga syudad ngan nagpasamwak han “maopay nga sumat” didto. Kondi kinadto hi Saulo ha iba-iba nga syudad basi bilngon an mga sumurunod ni Jesus. Tikadto na hiya ha Damasko. Pero ha dalan, may-ada urusahon nga nahitabo.

Tigda nga nagkaada hin duro nga kalamrag tikang ha langit ha palibot ni Saulo. Natumba hiya, sugad han aton nakikita dinhi. Katapos, may-ada tingog nga nagsiring: ‘Saulo, Saulo! Kay ano nga gintitimaraot mo ako?’ Hinkit-an han mga kaupod ni Saulo an lamrag ngan hinbatian an tingog, kondi waray nira masabti ito.

‘Hin-o ka, Ginoo ko?’ nagpakiana hi Saulo.

‘Ako hi Jesus, nga imo gintitimaraot,’ siring han tingog. Ginsiring ini ni Jesus tungod kay kon gintitimaraot ni Saulo an iya mga sumurunod, inaabat niya nga baga hin hiya mismo an gintitimaraot.

Hi Saulo nagpakiana: ‘Ano an akon pagbubuhaton, Ginoo?’

‘Buhát ngan kadto ha Damasko,’ siring ni Jesus. ‘Didto, susumatan ka han imo pagbubuhaton.’ Han binuhát hi Saulo ngan ginpukrat an iya mga mata, waray hiya nakita. Nabuta hiya! Salit ginkaptan hiya han iya mga kaupod ngan gintugwayan ngadto ha Damasko.

Ngan hi Jesus nagsiring ha usa han iya mga disipulo ha Damasko: ‘Buhát, Ananias. Kadto ha dalan nga tinatawag nga Tadong. Ha balay ni Judas bilnga an lalaki nga Saulo an ngaran. Ginpili ko hiya nga magin akon espesyal nga surugoon.’

Sinugot hi Ananias. Han nakita niya hi Saulo, ginkaptan niya hi Saulo ngan nagsiring: ‘An Ginoo nagpakanhi ha akon basi ka makakita utro ngan mapuno han baraan nga espiritu.’ Nahulog dayon an sugad hin mga hingbis tikang ha mga mata ni Saulo, ngan nakakita hiya utro.

Daku gud an naibulig ni Saulo ha pagsangyaw ha mga tawo ha damu nga nasud. Nagin kilala hiya sugad nga hi apostol Pablo, ngan damu pa an aton mahibabaroan mahitungod ha iya. Kondi, aton anay kitaon kon ano an iginpabuhat han Dios kan Pedro.