ANA akummanyilila mundu jwagonile pasijo? Jwalakwe ali Saulo. Akumbucile kuti jwalakwe ali mundu juŵalolelaga mikanjo ja acalume ŵaŵamponyaga maganga Sitefano. Alole kuŵala kwamnopeko! Cici cacikutendekwa?

Sitefano ali am’wuleje, Saulo akuŵa jwakulongolela pakwasakula ŵakumkuya Yesu kuti ŵasawusye. Akwawula nyumba ni nyumba ni kwakamulaga, kaneko ni kwaponyaga m’nyumba ja ukayidi. Ŵakumkuya Yesu ŵajinji akutilila ku misinda jine nikutanda kulalicilaga “ngani syambone” kweleko. Nambo Saulo akwawulasoni ku misinda jinejo kukwalolesya ŵakumkuya Yesu. Sambano ali paulendo wakwawula ku Damasiko. Nambo paulendowu, pakutendekwa cindu cakusimonjesya cakuyicisyaci:

Mwacisisimucila kuŵala kwakutyocela kumawunde kukum’ŵalila Saulo. Jwalakwe akugwa pasi, mpela mwatukum’wonela pelepamu. Kaneko gakupikanika maloŵe gakuti: ‘Saulo, Saulo! Mkusawusya ligongo cici?’ Acalume ŵali ni Saulo akukuwona kuŵala kula, soni akupikana maloŵe gala, nambo ngakupikanicisya yayikuŵecetegwa.

Saulo akuwusya kuti: ‘Ana wawo ali nduni, Ambuje?’

Maloŵe gala gakuti: ‘Une ndili Yesu, jumkum’sawusya.’ Yesu akuŵeceta yeleyi ligongo Saulo pakwasawusya ŵakumkuya Yesu, jwalakwe akupikana mumtima mwakwe mpela kuti akumsawusya jwalakwe.

Sambano Saulo akuwusya kuti: ‘Ambuje, ngusosekwa kutenda cici?’

Yesu akumsalila kuti: ‘Jimukani, soni mjawule ku Damasiko. Kweleko cakamsalile yamkusosekwa kutenda.’ Saulo pakwimuka nikuwugula meso gakwe, ngakukombola kulola cilicose. Jwalakwe atatele meso! Sambano acalume ŵali nawo ŵala akumkamula mkono nikumlongola kwawula najo ku Damasiko.

Sambano Yesu akuŵeceta kwa jwakumkuya jwakwe jwine ku Damasiko, acitiji: ‘Jimukani Ananiya. Mjawule ku msewu wakolanjikwa Wagoloka. Kunyumba ja Yudasi mkawusye lina lya mundu jwakolanjikwa Saulo. Jwalakwe namsagwile kuti aŵe jwakutumicila jwangu jwapajika.’

Ananiya akupikanila. Pakusimana ni Saulo, akumkwaya ni magasa gakwe nikuŵeceta kuti: ‘Ambuje andumisye une kwa mmwejo kuti mkombolesoni kulola, soni kuti mpocele msimu weswela.’ Ndaŵi jijojo cindu cine cakuwoneka mpela maŵamba ga somba cikugwa kutyocela m’meso mwa Saulo, soni akutanda kulola.

Saulo akumkamulicisya mnope masengo pakulalicila kwa ŵandu ŵamitundu jejinji. Kaneko jwalakwe akukolanjikwa ndumetume Paulo, jwacitulijiganye yine yejinji pakwamba ya jwalakwe. Nambo candanda, kwende tulole akumtuma Mlungu kuti Petulo akayitende.