Historia 108

Neza ni zeʼ Damasco

NANNUʼ tuu nga nexhe layú ca la? Nga nga Saulo. Laabe nga ni gúpabe xhaba cani bichá guié Esteban que. ¡Biiyaʼ biaaniʼ cuzaaniʼ ca! Xi cayaca pue.

Guti si Esteban la? Saulo yeyubi ca xpinni Cristu para guninabe laacaʼ. Riuube ralídxicaʼ, ribeebe laacaʼ ne ruseguyoobe laacaʼ. Stale de ca discípulo que ruxooñecaʼ ne riecaʼ sti guidxi ne raqué rucheechecabe «stiidxa Cristu». Peru Saulo riebe sti guidxi riyúbibe ca xpinni Cristu. Yanna maʼ zebe Damasco. Neza zebe la? raca xiixa guendaridxagayaa:

Málasi, ti biaaniʼ de guibáʼ ruzaaniʼ Saulo. Laabe riábabe layú, casi ruuyuʼ lu dibuju riʼ. Óraque binadiágabe ti ridxi ni na: ¡Saulo, Saulo! Xiñee cayuninaluʼ naa pue. Ca hombre ziné Saulo que ruuyacabe biaaniʼ que ne runadiágacabe ridxi stiʼ ni caníʼ que, peru qué ganda guiénecabe ni.

Tu lii yaʼ Señor, na Saulo.

Naa nga Jesús, ni cayuninaluʼ ca, na ridxi que. Jesús riniʼbe sicaríʼ purtiʼ ora runiná Saulo ca xpínnibe la? Jesús racaná casi ora ñúnicabe ni laabe.

Saulo rinabadiidxaʼ laabe: Xi naquiiñeʼ guneʼ yaʼ Señor.

Biasa ne guyé Damasco, na Jesús rabi laabe. Racá zábicabe lii xi guʼnuʼ. Ora Saulo riasa ne ruxhalelú la? qué randa ruuyaʼ gastiʼ. ¡Richeepaʼ lube! Ngue runi, ca hombre que rigápicaʼ nabe ne rinecaʼ laabe Damasco.

Jesús riniʼné ti discípulo ni nuu Damasco ne rábibe laa: Biasa Ananías, ne guyé neza ni láʼ Derecha. Ralidxi Judas gunabadiidxaʼ pur ti hombre láʼ Saulo. Naa maʼ guliéʼ laabe para gácabe xpinneʼ.

Ananías ruzuubaʼ diidxaʼ. Ora ruuyabe Saulo la? ribaquinabe luguiáʼ ne riniʼbe: Señor biseenda naa ti ganda guʼyuʼ sti biaje ne guidxaluʼ de espíritu santu. Oraqueca riaba casi jlaza lú Saulo, ne laa ribiguetaʼ ruuyaʼ.

Saulo guizáʼ biquiiñebe para guiníʼnebe binni de sti guidxi ni na Stiidxaʼ Dios. Ne runibiáʼcabe laabe casi apóstol Pablu, ne zazíʼdirunu jma de laabe. Peru yanna primeru guidúʼyanu xi rucaa Dios guni Pedru.

Hechos 8:1-4; 9:1-20; 22:6-16; 26:8-20.