¿NANLO chú láabu náaxh layoo la? Nacbu Saulo. Láabu gop xhap guirá buñ ni bigasguiee Esteban. ¡Bibiʼ guii ni racaptzaʼ! ¿Xí láani cayac?

Órni Esteban goity, Saulo riebu rayopybu guirá ni racanal Jesús par gonybu mal biinreʼ. Hasta lanioʼ rioʼbu rabébu né rasalbu press guirá ni racanal Jesús. Xidal xpiin Jesús raxony riée stipnés gudxrop né lagary ro radxiinyibu rasaló raniyibu «diitz sacró» xtuny Dios. Per Saulo riée rayopy xpiin Jesús lainy stipnés gudxrop. Nigoreʼ ma séebu gudx Damasco. Per ló néz ro séebu rac toib cós ni radziguiaʼ buñ.

Tisintiempsi toib guii ni sieed guibá rasanídxich ronoʼ Saulo. Láabu riabbu layoo, mod rabino ló dibuj reʼ. Ór cú toib rudx raiby láabu: ¡Saulo, Saulo! ¿Xigony cayonylo mal naʼ? Tipnés buñguieeu ni noʼ né láabu rabíyibu guii ni racaptzaʼ né racadiagyibu rudx reʼ, per diti labúu rienyibu láani.

Saulo ranabdiitz: Xoʼ, ¿chú looy?

Rudx ni racadiagbu náni: Naʼ ngú Jesús ni cayonylo mal. Jesús raniʼ ndeʼ portín órni Saulo rony mal xpiimbu, rioʼobni Jesús suusi ñonyibu láani láabu.

Saulo ranabdiitz nigoreʼ: ¿Xí láani non goni?

Jesús raiby Saulo: Biás né goyee Damasco. Lagary reʼ gannlo xí ni non gonylo. Órni Saulo riás né raxal bisaló, má diti labúu rabíbu. ¡Ma nachep bisalóbu! Por ngú, tipnés buñguieeu ni noʼ né láabu ma ló ñayibu rinéyibu Saulo gudx Damasco.

Nigoreʼ Jesús raninébu toibtica xpiimbu ni noʼ Damasco né raibybu buñguieeu reʼ: Ananías biás, goyee ló néz ni laa Recta. Órni ma bidxinlo lidx Judas gonabdiitz por toib buñguieeu ni laa Saulo. Portín ma golúya láabu par gacbu toib buñ ni gony xchiina ni rasac.

Ananías rasobdiitz. Órni radxinbu ronoʼ Saulo, raguiʼxbu ñabu laidy Saulo né ranibu: Jesús bixel naʼ par labúu guibilo stoib né guicálo xiroʼ fuers ni Dios raquiin par gonybu ni nábu. Órcuca ni ralooypa nac xomod laaz ni caa bisaló Saulo riab layoo, né ma labúu rabíbu stoib.

Jehová nigolú raquiimbu Saulo par gony xchiimbu guininébu buñ de xidal gudxrop. Radxiin rimbu buñ láabu xomod Pablo toib xpiin Jesús, né guisuidyno más de láabu. Per primer guisuidyno ni raxel Dios gony Pedro.