Abahüdaguni 109

Féduru bisidei Korunéliu

NIHÁN apostolu Féduru rara ya, ani lanagangiñe añahein fiú lumadagu. Ani, ka san uagu láhuduragua wügüri le ligibugiñe Féduru? Mosu san ladügüni le? Subuditi bun katei lan wügüri le?

Korunéliu líribei. Aban hábuti súdaragu Rómana. Ibidiñeti Féduru lun Korunéliu, ani ariñawaguati lun, lun lagunbirahani lúbiñoun. Warihaali ida liña lan lasuseredun le.

Ha furumiñetiñu afalaruti Hesusu Huríu meha, ánheinti Korunéliu mama huríu. Gama lumoun, hínsiñeti Bungiu lun, afurieidati lun, adügati giñe bandi katei buiti houn gürigia. Aban rábounweyu, aba lasaliragun aban ánheli lun, lariñaga: ‘Hínsiñetibu lun Bungiu, ani lóunabubei bafurieidún. Ounahabá ougei aban wügüri gíriti Féduru. Anihein Hope, lúbiñe Simón, le aganóubei yarafa lun barana.’

Aba ladügüni Korunéliu katei le lau loufudagun. Larugan, ñun liña Féduru tábulugu luban Simón. Ñein aba ladügün Bungiu lun lasaminarun Féduru larihiña lan aban gamisa harutu ararira siélugiñe, hau sun hawuyeri animaalugu tidan. Según lilurudun Bungiu, wíyetiña animaalugu ha lun heigín, gama lumoun aba lariñagun aban umalali: ‘Saraba Féduru, áfaraba hádangiñe lun beigin.’

‘Uá!’ liña lóunabun Féduru. ‘Méiginñahagidina ni kata le wíyeti.’ Gama lumoun, aba lariñagun umalali ligía: ‘Mariñagabá wiye lan katei le uagubei lariñaga Bungiu guentó haruma lan.’ Susereti le ǘrüwa wéiyaasu. Lidan aniha lan Féduru álügüdagua lungua ka lan lilabei le, aba hachülürün wügüriña ha lóunahabaña Korunéliu áluahei.

Aba lararirun Féduru lariñaga: ‘Au wügüri le háluahabei. Ka gabügürübalün?’ Dan le hafuranguagüdüni wügüriña aban lan ánheli ariñagubei lun Korunéliu lun lagunbirahani Féduru lúbiñoun, aba lariñagun Féduru lidinba lan hama. Larugan, aba láfuridun Féduru hama fiú lumadagu lun houdin bisidei Korunéliu Sesaréa.

Óundaragua laaña Korunéliu liduheñu hama lumadagu ha yarafatimabaña lun. Dan lachülürün Féduru, aba láhuduragun Korunéliu ligibugiñe, kei barihini ya. Gama lumoun, aba lariñagun Féduru lun: ‘Ráramaba; wügüri giñe au.’ Anha, arufudatu Bíbülia wuriba lan láhudurawagun lun wügüri. Lúnrügüba Heowá wáhuduragua.

Guentoti aba lapurichihan Féduru houn sun ha ñeinbaña. ‘Ariha naali guentó luagu resibi laniña Bungiu sun gürigia ha busentiña heseriwidun lun,’ liña Féduru. Lidan aniha lan ayanuha, aba lóunahani Bungiu lani sífiri sandu, aba hagumeserun gürigia hagía adimureha lidan ámuñegueinarügü iñeñei. Aba taweiridun hanigi disipulugu huríu ha ñǘbuinbaña luma Féduru, ha afiñebaña huríurügüñanu lan leresibira Bungiu. Arufudahati le luagu marihin lan Bungiu aban rasa kamá buitimaati o íñutimaati hawéi ha híbiri. Ma buiti lun waritaguni le sun wagía?

Adügaü 10:1-48; 11:1-18; Arufudúni 19:10.