SI APOSTOL Pedro kanang nagbarog diha, ug kanang sa luyo niya mao ang pipila sa iyang mga higala. Apan ngano man ang tawo mihapa kang Pedro? Nganong nagbuhat siya niana? Nahibalo ka ba kon kinsa siya?

Ang tawo mao si Cornelio. Siya usa ka opisyal sa Romanong kasundalohan. Gisultihan siya sa pagdapit kang Pedro sa iyang balay. Susihon ta ang hinungdan.

Ang unang mga sumusunod ni Jesus maoy mga Hudiyo. Apan si Cornelio dili Hudiyo. Sa gihapon siya nahigugma sa Diyos ug maluluy-on sa katawhan. Busa, usa ka hapon usa ka manulunda mipakita kaniya ug nag-ingon: ‘Ang Diyos nahimuot kanimo ug nagtubag sa imong mga pag-ampo. Sugoang pipila ka tawo sa pagkuha kang Pedro. Siya nag-estar sa Jope sa balay ni Simon.’

Buweno, diha gilayon, si Cornelio nagsugo pipila ka tawo sa pagpangita kang Pedro. Sa sunod adlaw, si Pedro diha sa ibabaw sa lapad nga atop sa balay ni Simon. Dinha ang Diyos mipapalandong kang Pedro nga siya nakakita sa usa ka dakong panapton nga puno sa tanang matang sa mga mananap. Sumala sa balaod sa Diyos, kining maong mga mananap dili mahinlo alang sa pagkaon, pero ang usa ka tingog nag-ingon: ‘Bangon, Pedro. Pag-ihaw ug kaon.’

‘Dili!’ miingon si Pedro. ‘Ako wala pa gayod makakaon sa dili mahinlo.’ Apan ang tingog miingon: ‘Hunong sa pagtawag nga dili mahinlo sa giingon karon sa Diyos nga mahinlo na.’ Kini nahitabo sa tulo ka higayon, ug si Pedro nahibulong kon unsay kahulogan niini. Unya ang mga tawong gisugo ni Cornelio miabot ug nangutana bahin kang Pedro.

Si Pedro nanaog ug mitagbo kanila. Ang mga tawo misaysay nga usa ka manulunda misulti kang Cornelio sa pagdapit kang Pedro sa iyang balay. Si Pedro miuyon sa pag-uban kanila, ug sa sunod adlaw siya ug ang iyang mga higala nangadto.

Si Cornelio mitagbo kang Pedro. Miyukbo siya sa tiilan ni Pedro, ingon sa imong makita dinhi. Apan si Pedro miingon: ‘Tindog; ako mismo usa lang ka tawo.’ Oo, ang Bibliya nagpakitang dili husto ang pagyukbo ug pagsimbag tawo. Magsimba lang kita kang Jehova.

Si Pedro karon miwali sa nagkatigom. Samtang siya nagsulti, ang Diyos mipadala sa iyang balaang espiritu, ug ang katawhan misugod sa pagsulti sa lainlaing pinulongan. Kini nakapatingala sa mga Hudiyong tinun-ang kauban ni Pedro kay sila naghunahuna nga ang mga Hudiyo ra ang giuyonan sa Diyos. Busa karon sila nakakat-on nga ang Diyos wala maglantaw sa katawhan sa bisan unsang rasa ingon nga labing maayo o labaw ka hiungdanon kay sa katawhan sa laing rasa. Dili ba kana maayong hinumdoman natong tanan?