YONO kali postolo Petulu unamana hano, hamwe ni masepa jenyi waze ali kunyima lienyi. Alioze mumu liaka lunga au anafulamana kulutwe lia Petulu? Te chatamba iye kulinga chuma chino? Yena unanyingika iye iya?

Lunga wacho jina lienyi Koneliu. Iye te kapitau wa chizavu cha maswalale A-Roma. Koneliu te kaso kunyingika Petulu, alioze iye yatuma kumusanyika hanga eze ku zuwo lienyi. Tutalenu kuchi chino chinakapwa.

Tumbaji atangu a Yesu te A-Yunda, alioze Koneliu te hi Ka-Yunda ko. Chipwe chocho iye te kakuzanga Zambi, te kakulemba kuli iye, nawa iye te kakulinga yuma yinji yipema kuli atu. Kashika ha chimwe chingoloshi umwe mungelo yasoloka kuli iye nawa yamba ngwenyi: ‘Zambi kapemena hali yena, nawa iye makumbulula yilemba ye. Tuma amwe atu hanga anehe umwe lunga yoze anavuluka ngwo Petulu. Iye te kali ku Yopa mu zuwo lia Semone, hakamwihi ni kalunga-lwiji.

Mba, hazehene Koneliu yatuma amwe malunga hanga aye ni kusaka Petulu. Ha tangwa lize linakasuloho, muze malunga jacho te haheta hakamwihi ni Yopa, Petulu te kali ku chipatulo cha kwilu mu zuwo lia Semone. Zambi yalinga hanga Petulu anyonge ngwe te kanamono limwe hina linene linaholoka mu malilu. Ha hina liacho te hali milali yeswe ya tushitu. Nikulita ni shimbi ja Zambi, tushitu jacho te kali aluchisa waze katelele kwaalia, alioze limwe liji yiliza mwilu ngwo: ‘Petulu katuka. Shaha hanga ulie.’

Petulu yakumbulula ngwo. ‘Ka! Yami kanda nguchilia kama nichimwe chuma cha luchisa.’ Alioze liji yiliamba nawa kuli Petulu ngwo: ‘Kanda uvuluka yuma yize Zambi apemesa, ngwo yili ya luchisa.’ Chino yichipwa ha yisuho yitatu. Muze Petulu te ananyongo chinji ha yuma yino, malunga waze Koneliu atumine yaheta ku zuwo, yahula Petulu.

Petulu yasunuka ha ndalo nawa yamba ngwenyi: ‘Yami mwe lunga yoze yenwe nunafupa. Yika yanuneha kunu?’ Muze malunga jacho halumbununa ngwo umwe mungelo yamba kuli Koneliu ngwo sanyika Petulu hanga eze ku zuwo lie, mba Petulu yatayiza kuya hamuwika ni ayo. Tangwa lize linakasuloho, Petulu ni masepa jenyi yaya ni kumeneka Koneliu mu Sezarea.

Koneliu te hakungulula asoko ni masepa jenyi hamuwika. Muze te Petulu aneza, Koneliu yaya ni kumupatwiza. Iye yasa makungunwa hashi yafulamana ku molu ja Petulu, ngwe chize yena unamono ha chizulie. Alioze Petulu yamba ngwenyi: ‘Katuka, ni yami nguli mutu.’ Ewa, Mbimbiliya yinasolola ngwo hi chipema ko kuwayila mutu. Yetwe chatutamba kuwayila wika Yehova.

Petulu yambujola kuli waze eswe te analikungulula. Petulu yamba ngwenyi: ‘Haliapwila yami namona ngwo Zambi kakutayiza atu eswe waze anazange kumulingila.’ Muzemwene te iye machihanjika, Zambi yatuma spiritu musandu yenyi, nawa atu yaputuka kuhanjika mu malimi eka ni eka. Yino yiyikomokesa tumbaji A-Yunda waze anakeza hamuwika ni Petulu, mumu ayo te kakunyonga ngwo Zambi kakuwahisa wika A-Yunda. Yino yinakaalongesa nawa ngwo kumana Zambi keshi kunyonga ngwo kuli umwe munyachi upema hanji ulemu kuhianyisa minyachi yikwo. Yino hi shimbi yipema ko yize yetwe eswe chatutamba kweuluka?