KHIKA i a dir ko mi khi lamkaltu Piter a si i, a hnulei in a dir mi hna cu a hawile an si. Asinain zeicahdah hi mipa cu Piter kha a kunpiak? Hi bantuk in tuah awk a si maw? Amah cu ahodah a si nan hngal maw?

Hi mipa cu Kornelias a si. Amah cu Rom ralbawi pakhat a si. Kornelias nihcun Piter cu a hngal lo, sihmanhsehlaw amah kha a inn lei i kawh awk ah chimh a rak si. Zeitindah mahcu a si ti zohhmanh u sih.

Jesuh zultu hmasa bik pawl cu Judah mi an si. Kornelias cu Judah mi a si lo. Asinain Pathian kha a dawt i, a sin ah thla a cam zungzal i, mi caah ṭhatnak rian tampi a ṭuan. Nikhat cu zanlei sang ah khin vancungmi pakhat a sin ah a lang i: ‘Pathian cu na cung ah a lung aa lawm i, na thlacamnak kha an leh cang lai. Mi thlah hna law Piter an ti mipakha va auhter hna. Amah cu rili kam i a um mi Joppa khua Saimon inn ah a um,’ tiah a ti.

Kornelias nih mi kha a thlah colh ve hna i Piter kha a va auhter hna. A thaizing ah mi hna cu Joppa khua an phak dengmang tik ah, Piter cu Saimon a inn cung dot ah a um. Cuka ahcun Pathian nih Piter cu puan kaupi vancung in a rung ṭum mi a hmuhter. Puan chung ahcun saram phun tling an um dih. Pathian nawlbia bantuk in cu saram hna cu rawl caah a thiang lo mi an si i, asinain aw pakhat nih: ‘Tho tuah, Piter. That hna law ei tuah hna,’ tiah a rak ti.

Piter nih: ‘A si lo! A thiang lo mi cu ka ei bal lo,’ tiah a leh. Sihmanhsehlaw aw nihcun Piter cu: ‘Atu ah Pathian nih a thiang a ti mi cu a thiang lo tiah ti ti hlah,’ a run ti. Voithum tiang cubantuk in a theih. Piter nih zei sullam dah a si hnga ti a ruah lio ah, Kornelias nih a hun thlah mi hna cu, cu inn ahcun an hung phan i Piter a um maw tiah an hal hna.

Piter cu tang dot ah a vung ṭum i: ‘Nan kawl mipa cu keimah hi ka si. Zei herh ah dah nan rat?’ tiah a ti hna. Khi mi hna nih vancungmi pakhat nih Kornelias kha na inn ah rat awk ah Piter kha va auhter hna tiah a chimhnak kong kha an chimh tik ah, Piter cu an sin i kal awk ah a hna a tla colh. A thaizing ah Piter le a hawile cu Sisaria khua i Kornelias tlawn awk ahcun an i thawh.

Kornelias nihcun a rualchan hna le a hawikawm pawl kha a inn ah a rak pumh dih cang hna. Piter a rat tik ah Kornelias nih a va don. A khuk aa bil i Piter ke hram ah khan hika i nan hmuh bang hin a kun. Sihmanhsehlaw Piter nih: ‘Tho tuah; keimah zong minung pei ka si ve ko cu,’ tiah a ti. Jehovah lawng kan biak awk a si.

Cun khi aa pum mi vialte hna kha Piter nih phung cu a chimh hna. ‘Amah biak a duh mi paoh Pathian nih a co hna ti kha ka hngalh,’ tiah Piter nih a ti. Cun cutin bia a chim lio ahcun Pathian nih a thiangthlarau kha a run thlah i, mi hna cu holh phun dangdang in bia an chim cio. Piter he a ra mi Judah mi zultu pawl cu an khuaruah a har ngaingai. Zeicahtiah Judah mi lawng Pathian nih a dawt hna tiah an rak ruah. Cucaah mah nihcun Pathian nih miphun phunkhat cu a dang phunkhat nak in a ṭha deuh le a biapi deuh in a ruat lo ti kha a cawnpiak hna. Cucu kan i cinken zungzal awk ah a ṭha mi thil a si lo maw?