SA SE zapot Pyer ki pe debout la, e sa ki pe debout deryer li se son bann zanmi. Me akoz sa zonm pe salye Pyer? Eski i devret fer sa? Ou konnen lekel sa zonm?

Sa zonm se Korney. I ti en zofisye larme Romen. Korney pa ti konn Pyer, me i ti ganny demande pour envit Pyer dan son lakaz. Annou vwar konman ki sa ti arive.

Bann premye disip Zezi ti bann Zwif, Korney pa ti en Zwif. Me i ti kontan Bondye, i ti priy avek li, e i ti fer en kantite bon keksoz pour bann dimoun. Byen, en zour apremidi, en lanz ti aparet avek li e i ti dir: ‘Bondye i kontan ou, e i pou reponn ou lapriyer. Anvoy detrwa zonm pour al sers en serten zonm ki apel Pyer. I pe reste an Zope dan lakaz Simon ki obor lanmer.’

Toudswit, Korney ti anvoy detrwa zonm al sers Pyer. Lannmen, kan sa bann zonm ti pe ariv pre avek Zope, Pyer ti lo twa lakaz Simon. Anler lo twa, Bondye ti fer Pyer mazinen ki i vwar en gran tapi sorti dan lesyel. Dan sa tapi ti annan tou sort kalite zannimo. Dapre lalwa Bondye, sa bann zannimo pa ti bon pour manze, kantmenm sa en lavwa ti dir: ‘Leve, Pyer. Touye e manze.’

‘Non!’ Pyer ti reponn. ‘Mon pa’n zanmen manz nanryen ki pa prop.’ Me sa lavwa ti dir avek Pyer: ‘Aret apel sal bann keksoz ki Bondye i dir i prop.’ Sa ti arive trwa fwa. Pandan ki Pyer ti pe mazinen ki tousala i vedir, sa bann zonm ki Korney ti’n anvoy zot ti ariv kot lakaz e demande pour vwar Pyer.

Pyer ti desann e i ti dir: ‘Mwan menm sa zonm ki zot pe rode. Akoz zot in vin isi?’ Kan sa bann zonm ti eksplike ki en lanz ti’n dir avek Korney envit Pyer kot son lakaz, Pyer ti dakor pour al avek zot. Lannmen, Pyer ek son bann zanmi ti al vizit Korney an Sezare.

Korney ti rasanble son fanmiy ek son bann zanmi pros. Kan Pyer ti arive, Korney ti vin zwenn li. I ti bese e azenou obor lipye Pyer, parey ou vwar la. Me Pyer ti dir: ‘Leve, akoz mwan osi mon zis en zonm.’ Wi, Labib i montre ki i pa byen pour azenou e ador en zonm. Nou devret ador selman Zeova.

Aprezan Pyer ti koz avek bann ki ti’n rasanble la. ‘Mon vwar ki Bondye i aksepte tou dimoun ki oule servi li,’ Pyer ti dir. E pandan ki i ti pe koze, Bondye ti anvoy son lespri sen, e bann dimoun ti konmans koz dan diferan langaz. Sa ti sirprann bann disip Zwif ki ti’n vin avek Pyer, akoz zot ti mazinen ki Bondye i kontan selman bann Zwif. Alor sa ti montre zot ki Bondye pa konsider okenn pei pli bon oubyen pli enportan ki en lot pei. Eski sa pa i en bon keksoz pour nou tou mazinen?