WEG apóstol Pedro nugad gwissi anmar dagge, geb Pedro yarganbardi abar e aimar gwismala. Auggi we duledi, ¿ibigala Pedro asabinni sindigar sisunna? ¿Weyob imagged nuedi? ¿Be wisi we dule doawa?

We dule nuga Cornelio. Roma soldadomar e dummadmogana. Cornelio wissuli Pedro doagi, auggine ega soglesa e negse sedagoye. Anmar daggoena igi weyobi ibmar gunoniggi.

Gebe Jesús sordag gusmalad judíomala, auggine Corneliodi judío suli. Deginigwale, Babdummad sabe, ese gordae, geb buggidar ibmar nuegan dulemarga imagdae. Degiidgi, ibagwengi sedogidba, ángel wargwen ese addagnoniggi geb ega soge: ‘Babdummad yeer be dagge, geb be ese ibmar egisedi beg imaggoe. Be dulemar barmide, dule Pedro nugad aminaega. Jopeg mai, Simón neggi, dermar nagab’.

Degsoggu, Cornelio yog deyob imaggaled. Bangine, Pedro sunadabmalad bad Jope neggwebur waliggusmargu, Pedrodi, Simón neg birgi gudii, ar Simón negmaddargwa sobaled. Agine Bab imasa Pedro samor dummad nib agdedani dagsiiyob binsaedi. We samorgi ibdulamar galagwensur buggwa. Babigargi soglemai, we ibdulamar gulleged surye, auggi dule ega soge iddoali: ‘Pedro, gwisgue. Ibdula be oburgwe, be gunne’.

‘¡Suli!’ Pedro abinsoge. ‘Ar bibbisaar ibmar isgana an gundisulid’. Auggi dule ega soge iddoarbali: ‘Mer ibmar isganaye be sogo, ar Bab emisgi ibnuedye sogmaid’. Ilabaa we ibmar gusa. Pedro nase duggin egisgwissi guali ibu we ibmar ega obar dibeye, degiidgi, Cornelio dulemar barmisgusad nonimala.

Emisgi Pedro agdesa geb soge: ‘Bemar an amidii. ¿Ibig bemar an amimala?’. Dulemar sogsamargua ángel wargwen Corneliog sogsaye Pedro sedagoye e negse, Pedro soge emarba naoye. Banedgi, Pedro geb abar e aimala Cornelios addagnadmala, Cesarea neggweburse.

Cornelio na e gwenadgan geb e aimar e waliggamaladi oanbaggusa. Pedro nonigu, Cornelio, Pedro asabinni sindigar sigisa, igi sobarnaidgi be dagge. Auggi Pedro soge: ‘Gwisgue, ar an binsa dule gumogad’. Nabiri, Biblia soge dule asabinni anmar sindigar sigwedi, Babyob imaggega, nued surye. Unnila Jehová anmar Babdummadga anmar imaggoe.

Pedro emisgi bugmaladga babigargi sunmaggali. Soge: ‘An daggua Bab bela dulemar nued dagge, eg arbabimar sogele’. Degi sunmaggwissidgi, Bab na e gangued barmiali, geb bela dulemar bugmalad gaya baidbaid sunmaggarmala. Jesús sabbingan judíomalad Pedrob gudimalad geger we ibmar dagmala, ar emardi iduar binsadaenad Bab unnila judíomarbi nued dagye. We ibmar gusadi emar odurdasa Jehová unnila dulemar soggwenbi nued dagsurye. Bela anmar we ibmar ebinsaed abelege, ¿degsursi?