E TUCAKE tu oqori na yapositolo o Pita, ra qai tu mai dakuna e so na nona itokani. Ia na cava me mai cuva tiko kina vei Pita na tamata oqo? E dodonu beka nona cuva tiko oqori? O kila se o cei o koya?

Oqori o Konilio na turaganivalu ni Roma. Erau sega ni veikilai kei Pita, ia a tukuni vua me sureti Pita ina nona vale. Meda raica mada se yaco vakacava na ka oqo.

Era Jiu na imuri taumada i Jisu, ia o Konilio e sega ni Jiu. E lomana na Kalou, e dau masu vua qai dau caka vinaka tale ga. Ena dua na yakavi, a rairai vua e dua na agilosi qai kaya: ‘Sa lomani iko na Kalou, ena sauma dina na nomu masu. Tala e so na tamata mera lai kauti Pita mai Jopa. E tiko ena vale i Saimoni, e baravi.’

Sega tale ni bera nona sa tala yani e so na tamata o Konilio mera lai qarai Pita mai. Ena siga e tarava, ni ratou sa voleka yani i Jopa, a tiko ena delanivale i Saimoni o Pita. Sa qai cakava na Kalou me raivotutaka o Pita e dua na isulu levu e lako sobu mai lomalagi, ra qai tu kina na veimataqali manumanu. Ena lawa ni Kalou na manumanu oqo era sega ni savasava me laukana. Sa qai rogo e dua na domo: ‘Tucake, vakamatea mo kania.’

E sauma o Pita: ‘Sega! Au se sega vakadua ni kania na ka tawasavasava.’ E kaya tale vua na domo: ‘Kua ni kaya me tawasavasava na ka sa kaya na Kalou ni savasava.’ E yaco vakatolu na ka oqo. Ni se vakasamataka tiko ga o Pita na kena ibalebale, era sa yaco yani ina vale i Saimoni na italai i Konilio. Era tarogi Pita sara.

E siro sobu mai o Pita qai kaya: ‘O yau na tamata dou vaqara tiko. Na cava dou mai cakava?’ Ni ratou vakamacalataka na nona tukuna e dua na agilosi vei Konilio me sureti koya ina nona vale, e vakadonuya o Pita me lako vata kei iratou. Ena siga ga e tarava eratou sa lai raici Konilio kina i Sisaria o Pita kei iratou na nona itokani.

A soqoni ira mai na wekana kei ira na nona itokani voleka o Konilio. Ni yaco yani o Pita e mai kidavaki koya o Konilio. E tekiduru qai cuva vei Pita. Ia e kaya o Pita: ‘Tucake; o yau na tamata ga.’ Io, na iVolatabu e vakaraitaka ni sega ni dodonu meda cuva se sokalou vua na tamata. E dodonu meda qaravi Jiova duadua ga.

Sa qai vunau o Pita vei ira era a soqoni mai. ‘Au sa qai raica ni vakatara na Kalou mera qaravi koya o ira kece ga era vinakata.’ Ia ni se vosa tiko ga, sa tala mai na Kalou na yalo tabu, ra sa qai tekivu vosataka kina na tu oya na veimataqali vosa. Era kurabuitaka na veika oqo na tisaipeli Jiu era a lako vata mai kei Pita, nira nanuma ni vakadonui ira wale ga na Jiu na Kalou. E vakavulici ira na Kalou ni sega ni uasivi e dua na matatamata mai na dua tale. Oqori e dua na tikina vinaka meda nanuma tiko.