KO OÑEMBOʼÝVA koʼápe haʼe pe apóstol Pedro, ha ikupépe oĩ iñamigokuéra. Mbaʼére piko pe kuimbaʼe oñesũ Pedro renondépe? Oĩ porãpa pe ojapóva? Reikuaápa nde mávapa pe kuimbaʼe?

Pe kuimbaʼe héra Cornelio, peteĩ mburuvicha Roma ehersitopegua. Cornelio ndoikuaái Pédrope, péro ojeʼe chupe oinvita hag̃ua hógape. Jahechamína mbaʼéichapa oikóraʼe upéva.

Jesucristo segidorkuéra iñepyrũme hudío meme vaʼekue, péro Cornelio ndahaʼéi hudío. Upéicharõ jepe, haʼe ohayhu Ñandejárape, oñemboʼe chupe, ha ojapo heta mbaʼe porã tapichakuérare. Peteĩ kaʼaru, osẽ chupe peteĩ ánhel ha heʼi: ‘Ñandejárape iporã pe rejapóva, ha okontestáta ndéve ne ñemboʼe. Emondo ehekauka peteĩ kuimbaʼe hérava Pédrope. Pe lugár haʼe oĩha héra Jope. Oĩ Simón rógape, oikóva már ypýpe’.

Pyaʼe porã Cornelio omondo kuimbaʼekuéra oheka hag̃ua Pédrope. Upe día ohasa rire, umi kuimbaʼe og̃uahẽmbotávo, Pedro oĩhína Simón róga terrásape. Upépe Pedro ohechávaicha peteĩ savana guasu oguejýva yvágagui. Upe savana ári oĩ opaichagua mymba. Ñandejára léi heʼi koʼã mymba naipotĩriha ojeʼu hag̃ua. Péro peteĩ ñeʼẽ heʼi chupe: ‘Epuʼã, Pedro. Ejuka ha heʼu’.

‘Nahániri!’, okontesta Pedro. ‘Ndaʼúiva gueteri mymba ipotĩʼỹva.’ Péro pe oñeʼẽva heʼi chupe: ‘Anive ere naipotĩriha umi Ñandejára heʼíva koʼág̃a ipotĩha’. Upéicha oiko tres vése. Oñeporandu aja Pedro mbaʼépa heʼise ko mbaʼe, og̃uahẽ umi kuimbaʼe ombouvaʼekue Cornelio ha oporandu hikuái hese.

Pedro oguejy ha heʼi chupekuéra: ‘Che haʼe pe kuimbaʼe pehekáva. Mbaʼerãpa peju? Omombeʼu rire hikuái peteĩ ánhel heʼihague Cornéliope oinvita hag̃ua chupe, Pedro heʼi ohotaha hendivekuéra. Upe día ohasa rire, Pedro ha iñamigokuéra oho Cornelio rendápe Cesaréape.

Cornelio ombyatypáma iñamígo ha iparientekuérape. Og̃uahẽvo Pedro, Cornelio ohug̃uaitĩ chupe ha ojeity henondépe, rehechaháicha koʼápe. Pedro katu heʼi: ‘Epuʼã; chéko peteĩ kuimbaʼénte avei’. Upéicha, Ñandejára Ñeʼẽ ohechauka naiporãiha ñañesũ ha jaadora peteĩ kuimbaʼépe. Jaadoravaʼerã Jehovápe añoite.

Pedro koʼág̃a opredika umi oñembyatyvaʼekuépe. ‘Ahecháma Ñandejára oaseptaha opaichagua tapicha chupe oservisévape’, heʼi Pedro. Ha oñeʼẽ aja, Ñandejára ombou ijespíritu sánto, ha umi tapicha oñepyrũ oñeʼẽ heta idiómape. Upéva nohaʼarõi umi disípulo hudío ouvaʼekue Pedro ndive, pórke haʼekuéra oimoʼã Ñandejára ofavoreseha umi hudíope añónte. Upéva omboʼe chupekuéra Ñandejárape g̃uarã peteĩ rrása ndahaʼeiha iporãvéva térã iñimportantevéva ótrogui. Ajépa iporã enterove ñanemanduʼa upévare?