Ngewa ya 109: Vetelo Aimũthokea Kolinelio
ŨYA NĨ mũtũmwa Vetelo ũũngamĩte vaya, namo asu me ĩtina wake nĩ amwe ma anyanyae make. Ĩndĩ nĩkĩ mũndũ ũũ ũtulĩtye ndu mbee wa Vetelo? Nĩwaĩlĩte kwĩka ũu? Nĩwĩsĩ we nũũ?
Ũ mũndũ nĩ Kolinelio. Nĩ mũnene wa ita sya Alomi. Kolinelio ndesĩ Vetelo, ĩndĩ eeiwe amũthokye nyũmbanĩ yake. Ekai twone ũndũ ũũ weethĩiwe ata?
Aatĩĩi ma mbee ma Yesũ maĩ Ayuti. Kolinelio ndaĩ Mũyuti, ĩndĩ nĩwamwendete Ngai. Nĩwamũvoyaa na kũmeka andũ ma Ngai maũndũ maingĩ maseo. Mũthenya ũmwe syũa yeeeka mũlaĩka nĩwamumĩlĩĩile na asya: ‘Ngai nĩwendeew’e nue, na nũkũsũngĩa mboya syaku. Tũma andũ mathi makaete mũndũ wĩtawa Vetelo. Vetelo ekalaa Yova nyũmbanĩ ya Simoni, ũla wekalaa ũtee wa ũkanga.’
Vate kweteela Kolinelio nĩwatũmie andũ makamanthe Vetelo. Ũnĩ ũsu, andũ asu makilyĩ kũvika Yova, Vetelo aĩ nyũmbanĩ ya Simoni ĩũlũ. E vau Ngai nĩwatumie asũanĩa ta ũkwona ngũa nene ĩtheete kuma ĩtunĩ. Ngũanĩ ĩsu vaĩ nyamũ sya mĩthemba yonthe. Kwĩanana na mĩao ya Ngai, nyamũ isu syaĩ mbuku kwa kũĩwa, ĩndĩ wasya, wamwĩa: ‘Vetelo ũkĩla. Ũae ũye.’
Nake Vetelo asũngĩa: ‘Aiee! Nyie ndyaaya kĩndũ kĩte kĩtheu.’ Ĩndĩ wasya wamwĩa Vetelo: ‘Eka kwĩta kĩvuku kĩndũ kĩla Ngai ũkwasya nĩ kĩtheu.’ Ũndũ ũsu weekĩkie mavinda atatũ. Na Vetelo o aendee na kũsũanĩa ũndũ ũsu wĩonany’a ata, aũme ala matũmĩtwe nĩ Kolinelio mavika nyũmbanĩ ĩsu na makũlĩĩlya Vetelo.
Nake Vetelo atheea kuma nyũmbanĩ ĩũlũ na asya: ‘Ninyie mũndũ ũla mũũmantha. Nĩkĩ mwooka?’ Yĩla andũ asu maeleisye kana mũlaĩka amwĩie Kolinelio athokye Vetelo nyũmbanĩ yake, Vetelo eetĩkĩla kũthi namo. Ũnĩ ũsu Vetelo na anyanyae make nĩmaendie kwa Kolinelio kũu Kaisalea
Kolinelio nĩwoombanĩtye andũ ma nyũmba yake na anyanyae make. Yĩla Vetelo wavikie, Kolinelio amũthaũa. Nake atheea nthĩ na atulya ndu maaũnĩ ma Vetelo, o tondũ ũkwona vaa. Ĩndĩ Vetelo amwĩa: ‘Ũngama; nyie nakwa nĩ o mũndũ.’ Mbivilia yonanĩtye kana ti ũndũ waĩle kũtulĩlya mũndũ ndu na kũmũthaitha. Twaĩlĩte kũthaitha Yeova e weka.
Vetelo ĩndĩ amatavya asu moombanĩte, akĩmea: ‘Nyie nĩngwona kana Ngai etĩkĩlaa andũ onthe ala mendaa kũmũthũkũma.’ Na aendee na kũneena, Ngai atũma veva wake mũtheu, na andũ asu mambĩĩa kũneena na ithyomo syĩ kĩvathũkany’o. Ũndũ ũsu nĩwaseng’isye amanyĩw’a Ayuti ala mookĩte vamwe na Vetelo, nũndũ masũanĩaa kana Ngai endeeaw’a no Ayuti oka. Kwoou ũu wamamanyĩsya kana Ngai ndonaa andũ ma mbaĩ o na yĩva kwĩthĩwa me aseo kana me ma vata kwake kwĩ andũ ma mbaĩ ila ingĩ. Ũsu w’o tyo ũndũ mũseo ithyonthe twaĩlĩte nĩkũlilikanaa?
Meko 10:1-48; 11:1-18; Ũvuan’yo 19:10.
Makũlyo
- Ũũ nũũ ũtulĩtye ndu visanĩ ũũ?
- Mũlaĩka amwĩie Kolinelio ata?
- Ngai atumie Vetelo ona kyaũ e nyũmbanĩ ya ĩũlũ ya Simoni, ndũanĩ ya Yova?
- Nĩkĩ Vetelo weeie Kolinelio ndaĩlĩtwe nĩ kũmũtulĩlya ndu na kũmũthaitha?
- Nĩkĩ amanyĩw’a Ayuti ala maĩ vamwe na Vetelo maseng’ie?
- Nĩ ĩsomo yaũ ya vata twaĩlĩte nĩkwĩmanyĩsya kumana na Vetelo kũmũthokea Kolinelio?
Makũlyo ma kwongeleela
- Soma Meko 10:1-48.
Ndeto sya Vetelo ila syonekaa nthĩnĩ wa Meko 10:42 syonanasya kyaũ ĩũlũ wa wĩa wa kũtavany’a ũvoo mũseo wa Ũsumbĩ? (Mt. 28:19; Mko. 13:10; Meko 1:8)
- Soma Meko 11:1-18.
Vetelo eethĩiwe na woni mwaũ amina kũelewa nesa woneleelyo wa Yeova ĩũlũ wa andũ-ma-mbaĩ-ingĩ, na tũtonya kũatĩĩa ata ngelekany’o yake? (Meko 11:17, 18; 2 Ako. 10:5; Aev. 5:17)
