ANIHEBʼ li winq li wankebʼ saʼ li eetalil? Li winq li yook xyeʼbʼal li ruqʼ aʼan li apostol Pedro ut li wankebʼ rikʼin aʼanebʼ li ramiiw. Ani li winq wiqʼwo chiru chʼochʼ? Ma us naq kixwiqʼibʼ ribʼ chiru laj Pedro? Ut kʼaʼut naq kixbʼaanu aʼin?

Li winq aj Cornelio ut aj jolominel saʼ xyanqebʼ laj puubʼ saʼ li tenamit Roma. Laj Cornelio inkʼaʼ naxnaw ru laj Pedro. Abʼan kiyeheʼk re, naq tixkʼam chaq laj Pedro saʼ li rochoch. Chanru kikʼulmank aʼin?

Ebʼ li xbʼeen xtzolom li Jesus, ebʼ aj Judio, abʼan laj Cornelio maawaʼ Judio. Abʼanan naxra li Yos, natijok chiru ut naxtenqʼahebʼ li qas qiitzʼin. Saʼ jun li ewuuk jun li anjel kixkʼut ribʼ chiru laj Cornelio ut kixye re: ‹Li Yos tixsume laatij xbʼaan naq nawulak chiru laanaʼlebʼ. Taqla xbʼoqbʼal laj Pedro. Laj Pedro wank saʼ li tenamit Jope saʼ rochoch laj Simon, chi xkʼatq li palaw›.

Laj Cornelio saʼ junpaat kixtaqla xbʼoqbʼal laj Pedro. Saʼ li jun chik kutan laj Pedro wank saʼ xbʼeen li rochoch laj Simon, naq li Yos kixbʼaanu naq laj Pedro tixkʼoxla naq yook chi rilbʼal naq yook chaq chi kubʼeek saʼ choxa jun nimla tʼikr ut chisaʼ wank jalan jalanq chi xul. Saʼ xchaqʼrabʼ li Yos kixye naq ebʼ li xul aʼin moko us ta xtzakankil. Tojaʼ naq kirabʼi jun xyaabʼ kuxej: ‹Waklin Pedro, kamsihebʼ li xul ut waʼin›.

Laj Pedro kixye: ‹Inkʼaʼ! Maajunwa xintzaka li muxbʼil ru›. Li xyaabʼ kuxej kixye re laj Pedro: ‹Kanabʼ xyeebʼal naq muxbʼil xul aʼin, li yook xyeebʼal li Yos naq saqʼ ru›. Oxibʼ sut kixkʼul aʼin laj Pedro. Toj yook xkʼoxlankil laj Pedro kʼaru xyaalal aʼin, naq keʼwulak ebʼ li winq, li kixtaqla laj Cornelio.

Laj Pedro kiʼelk chaq ut kixye rehebʼ li winq: ‹Laaʼin li nekeesikʼ. Kʼaru nekeeraj wikʼin?› Ebʼ li winq keʼxchʼolobʼ chiru naq jun li anjel kixye re laj Cornelio naq tixtaqla xkʼambʼal laj Pedro saʼ rochoch. Naq laj Pedro kirabʼi aʼin kixkʼulubʼa xik chirixebʼ. Saʼ li jun chik kutan laj Pedro ut ebʼ li ramiiw kohebʼ Cesarea, saʼ rochoch laj Cornelio.

Laj Cornelio kixchʼutubʼ li xjunkabʼal ut ebʼ li ramiiw saʼ rochoch. Naq laj Pedro kiwulak, laj Cornelio kixwiqʼibʼ ribʼ chiru, joʼ nakʼutunk saʼ li eetalil. Abʼan, laj Pedro kixye re laj Cornelio: ‹Waklin, xbʼaan naq laaʼin yal winqin!› Li Santil Hu naxye naq moko us ta xwiqʼibʼankil qibʼ chiru junaq winq. Tento naq kaʼajwiʼ li Jehobʼa tqaloqʼoni ru.

Tojaʼ naq laj Pedro kiʼok xpuktesinkil li chaabʼil esilal rehebʼ li wankebʼ saʼ rochoch laj Cornelio ut kixye: ‹Ninkʼe reetal naq li Yos naxkʼulubʼa chixjunil li nekeʼraj xloqʼoninkil ru›. Toj yook ajwiʼ chi aatinak laj Pedro naq li Yos kixtaqla li xsantil musiqʼej saʼ xbʼeenebʼ joʼkan naq keʼok chi aatinak saʼ jalan jalanq chi aatinobʼaal. Naq ebʼ li ramiiw laj Pedro keʼril aʼin keʼsach xchʼool xbʼaan naq keʼxkʼoxla naq li Yos kaʼajwiʼ narusilahebʼ laj Judio. Aʼin kixkʼut chiruhebʼ naq li Yos juntaqʼeet narilebʼ chixjunil li tenamit. Us raj naq inkʼaʼ tsachq saʼ qachʼool aʼin!