IÚ Poxolo Phetele uemana bhobha, ni makamba ku dima diê. Maji mukonda diahi o diiala ua fukamena Phetele? Muéne ua tokalele ku bhanga kiki? Eie uejiia se muéne nanhi?

O diiala didi Koloneliu. Muéne kabhitangu ka masoladi a Loma. Koloneliu k’ejidile Phetele, maji a mu tumina ku mu ixana kubhata diê. Ndoko tu tale se kiebhi ki kia bhiti.

O akaiedi a dianga a Jezú, exile Jijudé, maji Koloneliu ki mukuá Judé. Maji muéne ua zolele Nzambi, iu uakexile ué ku mu bhingila, iu ua bhangele ué, ima iambote ku athu. Saí ngoloxi kua mu monekena anju iambe: ‘Nzambi ua ku zediuisa, iu ua-nda tambuijila o misambu iê. Tumina maiala kuia mu takana diiala a mu ixana Phetele. Muéne uala ku Jopa mu dibhata dia Ximá, bhu mbandu ia kalunga.’

Koloneliu ua tumikisa maiala phala ku sota Phetele. Mu kizuua kia kaiela-ku, kioso o maiala kia zukamene ku Jopa, Phetele uakexile mu sabhalalu ia inzo ia Ximá. Maji Nzambi ua bhangesa Phetele ku banza kuila ua mu mona mulele uonene ua mu tuluka ku diulu. Mu mulele mua kexile iama ia idifua ioso. Mu kitumu kia Nzambi, iama ia xidi ki ia tokalele ku idia, maji o dízui dia tundu ku diulu diambe: ‘Phetele balumuka. Jibha-iu ni u i die.’

Phetele ua tambuijila. ‘Kana!’ ‘Eme nuka nga dile kiama kia xidi.’

Maji o dízui diambela Phetele: ‘Kana ku ixana ia xidi, o ima ia zelesa Nzambi.’ Kiki kia bhiti mu veji jitatu. Kioso Phetele kia kexile mu banza ioso íii kua bhixila maiala a tumikisa kuala Koloneliu, ni ebhula Phetele.

Phetele ua tuluka ku sabhalalu, ni uambe: ‘Eme ngi muthu mua mu mu sota. Mueza mu bhanga ihi?’ Kioso o maiala kia jimbulula kuma o anju iambela Koloneliu phala ku ixana Phetele ku inzo iê, Phetele ua xikina kuia nâ. Mu kizuua kia kaiela-ku, Phetele ni makamba mê ai mu kunda Koloneliu mu Sezaleia.

Koloneliu uongeka o ndandu jê ni makamba mê. Kioso Phetele kia bhixila, Koloneliu u takajana nê. Muéne u fukama bhu inama ia Phetele kála ki ua mu mona bhabha. Maji Phetele uixi: ‘Emana; Eme ngi diiala ngó.’ Kiene, o Bibidia idikisa kuma ki kima kiambote ku fukamena, mba kubheza muthu. Tua tokala ngó kubheza Jihova.

Phetele ua boko o njimbu iambote ku iá a diongeka. Phetele uambe, ‘Nga mono kuila Nzambi u xikana athu oso a-ndala ku mu sidivila.’ Kioso kia kexile hanji mu zuela Nzambi ua tumikisa nzumbi ikôla, o mundu’oso ua mateka ku zuela dízui diéngi. O maxibulu akua Judé ejile ni Phetele, a diuanene mukonda a banzele kuma Nzambi ua bhangele ngó mbote ku akua Judé. Kiki kia a longo kuma Nzambi ka zolo ngó athu a kifuxi kimoxi, o ifuxi ia mukuá kana. Ki kima kiambote ku lembalala ima íii?