O MUNTU otelamene vava i Petelo wa ntumwa, ana bena yandi, akundi andi. Ekuma muntu ndioyo kafukamene Petelo? Nga ofwene fukamenwa? Ozeye muntu ndioyo?

Yandi i Koneleo. Mfumu a makesa ma Roma. Koneleo kazeye Petelo ko, kansi wavoveswa vo kabokelesa Petelo muna nzo andi. Yambula twazaya una diavangamena ediadi.

Alandi antete a Yesu Ayuda bakala, kansi o Koneleo ke Nyuda ko. Nzambi kavuminanga, wasambanga kwa yandi yo vana tukau twayingi kwa wantu. Lumbu kimosi, mbasi a Nzambi okotele vana kakala, umvovese vo: ‘Nzambi uyangalelele, owidi e sambu yaku. Tuma wantu kuna Yafo batwasa muntu nkumbu andi Petelo. Muna nzo a Simone kena, nzo andi ina vana ndambu a mbu.’

Vana vau, Koneleo otumini wantu benda vava Petelo. Oku mene-mene, vava bafinama evata dia Yafo, o Petelo otombokele vana nludi a nzo a Simone. Nzambi omwesese Petelo nlele ayalumuka wakulumuka tuka kun’ezulu. Vana nlele vakala ye bulu ya mpila zawonso. Mun’owu wa nsiku mia Nzambi e bulu yayi ke yavelela ko mu dia, kansi e ndinga yinluakidi oku vo: “Telama, e Petelo, vonda, wadia.”

Petelo ovutwidi vo: ‘Kilendi ko, kadi kiadidi nkutu ma kiafunzuka ko.’ E ndinga ivovese Petelo vo: ‘Kuvovi ko vo yafunzuka ina yaveleleswa kwa Nzambi.’ Ediadi diavangama nkumbu ntatu. O Petelo, wau kayangameno o moyo kana nkia mona-meso kiaki kamwene, o wantu batumwa kwa Koneleo balweke, bavavidinge Petelo.

Petelo okulumukini vana ven’o wantu, oku vo: “I mono yuyu, ona nuvava: mu nkia kuma nwizìdi?” Oyau vo, o Koneleo okanikinu kwa mbasi vo kabokelesa wenda kuna nzo andi. E lumbu kialanda o Petelo y’akundi andi bele kwa Koneleo kuna Kaisaria.

Koneleo okutikidi yitu yandi y’akundi. O Petelo vava kakotele, o Koneleo unkikidi. Ofukamene, unkundidi nze una omwene vava. Kansi o Petelo umvovese vo: “Telama, omono ova ngina, i muntu mpe.” Elo, Nkand’a Nzambi usonganga vo ke tufwete fukamena muntu ko yo kunsambila. Yave kaka tufwete sambila.

Petelo osidi umbangi kw’awonso bakutakene, oku vo: ‘Mbwene wo vo o Nzambi otondanga wantu a mpila zawonso ana bazolele kunsadila.’ Wau Petelo kevovanga mambu mama, o Nzambi oyitidi mwand’andi avelela kw’awonso bawidi e diambu. Bayantikidi vova ndinga zanzenza. E minkwikizi mia Yuda mina mizidi yo Petelo basivikidi, kadi edi babanzanga vo Nzambi Ayuda kaka kesonganga e ngemba. Ediadi diabalonga vo kuna kwa Nzambi ke vena kanda yovo zula kisundidi akaka ko. Nga diadi ke diambu diambote ko muna sungamena?