Icisimicisyo 109: Petilo Afakasya Kuli Konelyo
ULYA ni ntangisi Petilo emakene palya, kabili abo ni bamo bamo pa babyakwe abali kunuma yakwe. Pano mba nindo umwalalume amufukamina Petilo? Kani alyelelwe ukucite’co? Mba kani wamwisiba?
Umwalalume ni Konelyo. Cilolo ca fita ica baLoma. Konelyo tamwisipo Petilo, pano bamubula ukumwita kwakwe ku ŋanda. Leka tufwailisye ifi ici cabeleko.
Abasambile ba baYesu abakutanga baali baJuda, pano Konelyo talipo muJuda. Pano alitemenwe baLesa, alatembela kuli bo, alacita ne fya luse’fingi ku bantu. Icingulo inkalamba yaboneka kuli ye ne kulabila ati: ‘BaLesa basangalala pali webo, kabili baasuka itembelo lyobe. Lomba tuma abalalume bamo bamo mu kwita umwalalume uwe sina lya Petilo. Alukwikala ku Jopa ku ŋanda yakwe Simoni, iŋanda yakwe ili mu musesyo wa cisiba.’
Penka’po Konelyo atuma abalalume bamo bamo ukuya mu kufwaya Petilo. Ngamailo, ili abalalume balukupalamina ku Jopa, Petilo ali peulu pa mutenge wa ŋanda yakwe Simoni. BaLesa balenga Petilo ukulanguluka koti alukubona insalu iikulu ilukutulwa pansi ukufuma kwiulu. Mukati ka nsalu mwali imikoka yonse iya nama. Koti lifunde lya baLesa, isi nama tasyalipo isiswetele ukulya, pano isiwi lyalabila ati: ‘Buka, Petilo. Ipaya ne kulya.’
Petilo aasuka ati: ‘Koku! Pakuti nsingalyapo ifitafiswetele.’ Pano isiwi lyabula Petilo ati: ‘Leka ukwita ifi baLesa baswesya ati tafiswetele.’ Ici cacitwa litatu. Lomba pakulukukankamana Petilo mu mutima wakwe pakuboneko’ko, kusangana abalalume abatuminwe na Konelyo bafika pa ŋanda ne kwipusya pali Petilo.
Petilo atentemukila pansi kabili alabila ati: ‘Nebo ene woyo mulukufwaya. Mba nindo mwaisila? Ili abalalume balondamo ati inkalamba yacibula Konelyo ukwita Petilo ku ŋanda kwakwe, Petilo asumina ukuya nabo. Ngamailo Petilo ne babyakwe baalimine mu kufakasya kuli Konelyo mu Kaisalia.
Konelyo abunganya ulupwa lwakwe ne babyakwe. Ili Petilo aisa, Konelyo amucinsya. Awa pansi ne kufukamina pa makasa akwe Petilo, koti nififi ulukubona pano. Pano Petilo alabila ati: ‘Ima; nanebo ndi muntunsi.’ Fya cine, Baibolo ilatubula ati tacilipo icelelwe ukufukamina ne kupempela abantunsi. Tulyelelwe ukupempela lukoso baYehoba.
Petilo pano alukutulisya kuli babo ababungene. Petilo alabila ati: ‘Nabona’ti baLesa balasumina onse uyo uulukufwaya ukubapyungila.’ Kabili ili acilabila, baLesa batuma umupasi uswetelele, ne bantu batatika ukulabila mu milaka iipusenepusene. Ici cakankamanika bonse abasambile abaJuda abaisile na Petilo, nipakuti balukulanguluka ati baLesa balasyukisya lukuso abaJuda benka. Popele ici calibasambisye ati baLesa tababonapo ati uyu mukoka ucindeme kuli baLesa ukucila umukoka umbi. Tali ico cintu iciweme ici fwense twelelwe ukulukwanuka?
Ifyacitilwe 10:1-48; 11:1-18; Ukufisulula 19:10.
Ifyakwipusya
- Mbo’yu mwalalume afukeme mu cikope ninani?
- Findo inkalamba yabula Konelyo?
- Kani baLesa findo baleka Petilo ukubona ili ali pa mutenge wa ŋanda yakwe Simoni ku Jopa?
- Mba nindo Petilo abulila Konelyo ukweba’ti telelwepo ukufukama ne kupempela ye?
- Mba nindo abasambile abaJuda abali na Petilo bakankamanina?
- Nicisa icicindeme tungasambililako kuli Petilo ili afakesye kuli Konelyo?
Ifyakwipusya na fimbi
- Pendeni Ifyacitilwe 10:1-48.
Mba amasiwi akwe Petilo aali pa Ifyacitilwe 10:42 alalange’ndo pa kupyunga kwa kusimika icebo iciweme ica Bufumu? (Mat. 28:19; Mako 13:10; Cit. 1:8)
- Pendeni Ifyacitilwe 11:1-18.
Kani Petilo alicitile’ndo ili baYehoba bamubulile icakucita ku batabali baJuda, kabili koti twalonda syani icakubwenako cakwe? (Cit. 11:17, 18; 2 Kol. 10:5; Efes. 5:17)
