KHATA ding kha tirhkoh Petera a ni a, a hnunga dingte kha a thian thenkhatte an ni. Mahse engvanginnge kha mi kha Petera hmaa a kun? Kha kha a tih tur em ni? Tunge a nih i hria em?

Chu mi chu Kornelia a ni. Rom sipai officer a ni. Kornelian Petera a hre lo va, mahse a ina sawm turin hriih a ni a. Chutiang a nih theih dan i hmu chhuak ang u.

Isua zuitu hmasa chu Judate an ni a, mahse Kornelia chu Juda-mi a ni lo. Chuti chung chuan Pathian a hmangaih a, a hnenah a tawngtai a, mite tan ngiinei takin thiI tam tak a ti thin. Chawhnu vawi khat chu a hnenah vantirhkoh a lo lang a: ‘I chungah Pathian a lawm a, i tawngtaina pawh a chhang dawn e. Mi pakhat a hming Petera ko turin mi tir rawh. Joppa khuaa tuipui kianga cheng Simona inah a awm,’ a ti a.

Kornelia chuan Petera hmu turin mi a tir nghal a. A tukah, mite chuan Joppa khua an thlen dawnin, Petera chu Simona inchung zawlah a awm a. Chutah chuan van atanga puan lian pui lo uai chhuk hmuin Pathianin Petera a hriattir a. Puan chhungah chuan ransa chi tinreng an awm a. Pathian dan ang chuan chung sate chu ei thiang lo an ni a, chuti chung chuan awin: ‘Tho rawh, Peter. Talh la ei rawh,’ a ti a.

‘Ni lo ve! Thiang lo ka la ei ngai lo,’ tiin Peteran a chhang a. Mahse aw chuan: ‘Pathianin tuna thiang a tih tawh chu thiang lo ti suh,’ tiin Petera chu a hrilh a. Chutiang chuan vawi thum a lo awm a. Eng tihna nge tih Peteran a ngaihtuah laiin, Kornelia mi tirhte chu inah an lo thleng a, Petera an zawt a.

Petera a lo chhuk a: ‘In mi zawn chu ka ni e. Engvanginnge in lo kal?’ a ti a. Vantirhkohvin a ina Petera sawm turin Kornelia a hrilh a tih miten an hrilh veleh Peteran an hnena kal a remti a. A tukah Petera leh a thiante chu Kaisaria-ah Kornelia tlawh turin an kal chhuak ta a.

Kornelia chuan a laichinte leh a thiante a lo khawm a. Petera a lo thlenin Kornelian a hmuak a, A thingthi a, heta i hmuh ang hian Petera ke bulah a kun a. Mahse Petera chuan: ‘Tho rawh; kei pawh mihring mai ka ni,’ a ti a. Bible chuan kuna pathianbia anga mihring biak chu a dik lo tih a tilang a. Pathian biakin Jehova chauh kan be tur a ni.

Chung inkhawmte hnenah chuan Peteran thu a hril ta a. ‘Pathianin a rawng bawl duhtu zawng zawng a pawm tih ka hria,’ Peteran a ti a. Tin a sawi lai chuan, Pathianin a thlarau thianghlim a tir a, mite chu tawng danglamin an tawng ta a. Pathianin Judate chauh duhsaka an ngaih vangin Petera nena lo kal zirtir Judate chuan chu chu mak an ti a. Chuvangin hei hian Pathian chuan eng hnama mite mah hnam danga mite aiin Pathian tana tha zawk leh pawimawh zawkah emaw a ngai lo tih a zirtir a. Chu chu kan vaia kan hriat reng atana thil tha a ni lawm ni?