JÉ PASTRO Pedro xosíkji séjna ibi, kʼoa miyole mani xi tjíosí jto̱nyátsʼi̱n. Tonga, ánni nga xkóle tíbasénsínile Pedro je chjota xokji. A tjínnele kʼoasʼin. A ʼyaní ʼyáni.

Jení Cornelio. Jngo chjota títjonle soldado xi tsʼe Roma. Je Cornelio a likui bexkon Pedro, tonga kʼoatsakʼinle nga ya katanchjale ndʼiale. Kataʼyala jókoannile jebi.

Je xi títjon chjota tjenngile Jesús koan jéní chjota judío, tonga Cornelio a litsa judíojin. Tonga tsjoake koan Niná, tsakʼétsʼoale kʼoa tjao tsabe je chjota. Ñandia kʼianga koanxon jngo ánkje tsʼatsenle kʼoa kitsole: “Nda tísasénle Niná xi tʼatsi, kʼoa sitjoson je kjoabʼetsʼoali. Tikasain tsaʼyani nga katafikinyisjaili jngo chjota xi Pedro ʼmi. Ya Jope tíjna, ya ndʼiale Simón, xi ya tíjnachrian ya ndáchikon”.

Kjitʼanangi kʼoakisʼin Cornelio. Nga koannyaonni, je Pedro ya tíjna sonngʼa ndʼiale Simón. Jngo sén tsakakóle Niná je Pedro, jngo najñote xi tínroajenni ngʼajmi tsabe. Nkjín koya cho̱ tjíoson najño jebi. Tojotjín kjoatéxomale Niná, a likui ma chine cho̱ xokjoan nga tsín tsje, tonga jngo jta̱ xi kitso: “Tisótjain Pedro. Tikʼain kʼoa chinai”.

Pedro kitso: “¡Majain! Nisañandiajinla kui kjine tsojmi xi jndí”. Tonga je jta̱ kitsole: “Ali jndíjin ʼmilai jmeni xi kʼoatso Niná nga je tsje”. Jan kʼa kʼoatsakʼinle Pedro. Kʼianga tíkjonangile yaole jmé xi tsoyanile jebi, ya kichó je chjota xi kisikasén Cornelio nga katabásjai Pedro.

Kitjojen Pedro kʼoa kitsole: “Anña je chjota xi tibinyisjao. Jmé xá jaʼaiño”. Kʼianga je kʼoakitsole chjota xokjoan je Pedro nga jngo ánkje xokitsole Cornelio nga katanchjale Pedro ya ndʼiale, kʼoakitso Pedro nga koaikao. Nga koannyaonni, Pedro kao miyole kikonle Cornelio ya Cesarea.

Je Cornelio kisikatíoxkó xínkjín kʼoa kao xi nʼio miyole. Kʼianga je kichó Pedro, je Cornelio xkóle tsakasénle, josʼin matsen ibi. Tonga Pedro kitsole: “Tisótjain, chjotaña tsanda an”. Jaon, je Biblia kʼoasʼin bakóya nga tsín kixi tíjna nga xkóná kuinyalee chjota. Tojé Jeobá xi koa̱n kʼoétsʼoale.

Xijekoan, je Pedro tsakakóyale je chjota xi ya tjío, kitso: “Tiʼbeña nga sasénle Niná tojokji chjotani xi mele nga je sixále”. Kʼianga tínchja, Niná kisikasén je nganʼiotsjele, kʼoa je chjota xi ya tjío kjaʼai én kinchja. Tokoanxkónle je chjota tjenngile Jesús xi tjenkao Pedro, nga chjota judíoní, nga kʼoasʼin makjainle tsakai nga to chjota judío xi sasénle Niná. Jebi kui tsakakóyale kʼianga Niná likui faʼájin chjota josʼin tsen yaole kʼoa jñani tsʼe. A tsí nʼio ndatjín nga sikjaʼaitsjen ngatsʼia xi tʼatsʼe jebi.