Sturka 109

Pita Kornilius Ra Wih Kaikan

BUI ba apastil Pita, bara ninara ba ai panika nani. Sakuna dia muni ki waitna kum Pita mawanra baui ba? Aitani sa baku daukaia? Man nu sma witin ba ya sapa?

Witin nina Kornilius maki kan. Bara witin ba Rom suldiarka kum kan. Kornilius ba Pita ra kakaira apia kan, sakuna ai watla ra paiwan. Kaisa naha ba nahki takan sapa kaikaia.

Jisas nina blablikra pas nani ba Ju uplika kan, sakuna Kornilius ba Ju uplika apia kan. Ban sakuna witin ba Gâd ra latwan kaiki kan, bara witin ai pura suni wark yamni nani sin manas upla nani dukyara dauki kan. Bara tutni kum, insal kum witin ra taki win: ‘Gâd man ra yamni mai kaikisa baha mita puram sunra unakahbanka ba maikbia, bara man waitna kum nina Pita maki ba ra pliki bliks witin ba Jupa taunka ra sa, Saiman kabu un ra iwi ba watla ra.’

Bara Kornilius ba minitka ra waitna nani kum kum ra blikan Pita ra plikaia. Bara yu wala ra, waitnika nani ba Jupa lamara auya kan taim, Pita ba Saiman watla bahna purara kan. Bara baha ra Gâd mita Pita ra yaban witin ba kwala tara kum heven wina iwi aula kan kaikisa baku lukan. Bara kwalka ba bilara daiwan satka nani ailal bara kan. Sakuna Gâd laka ra, naha daiwra nani piaia ba saura kulkan kan, ban sakuna bila baikra kum mita Pita ra wi kan: ‘Pita, bui iki pis.’

Bara Pita pana win: ‘Apia! Yang diara taski nani ba aima kumira sin piras sna.’ Sakuna bila baikra ba win: ‘Nanara Gâd mita klin kaiki ba ra man mita taski kulkpara.’ Aima yuhmpa naku takan. Bara Pita kau naha ba dia tanka bri sapa luki kan taim, Kornilius mita waitna nani blikan kan ba watla ra wih bangwan.

Bara Pita ba mayara bal iwi, waitnika wan kan nani ra win: ‘Plikisma waitnika ba yang sna, sakuna man nani dia dukyara bali bangwram ki?’ Bara waitnika nani ba Pita ra win insalka ba mita Kornilius ra maisapahkan ba. Bara Pita sturka ba walan taim witin aikuki waia win. Yu wala, Pita ai panika nani aikuki Sesaria ra Kornilius kaikaia wan.

Kornilius ba ai taya bara ai panika nani sut asla praki bri kan. Bara Pita wan taim, witin Pita mina ra kauhwi ai lula krikan, man nara kaikisma baku. Sakuna Pita bila: ‘Bus; yang na upla kum sna man baku.’ Baibil ba saura kaikisa upla kum ra baui mayunaia ba. Yawan Jehova ra baman mayunaia sa.

Upla bara kan nani ra Pita ba smalki ta krikan. Bara win: ‘Param sa upla sut Gâd ra mayunaia brinka bri ba ra witin mita yamni kaikisa.’ Witin kau naha aisi kan bara Gâd mita ai spiritka hulikira wal uplika nani ba purara laikan bara witin nani bila sat wala nani ra aisi kan. Bara disaipel wala Ju uplika nani Pita wal balan kan ba, naha kaiki sirang iwi bangwan, kan witin nani luki kan Gâd ba Ju uplika nani ra baman yamni kaiki kan. Naha ba witin nani ra param marikan, Gâd nisan kyamka kumi ra sin kau pain kaiki kulkanka tara yabras ba dukyara. Naha wan kupia krauki kaia ba pain sa rait apia?

Wark nani 10:1-48; 11:1-18; Param marikan 19:10.