Historia 109

Pedro kontlajpaloua Cornelio

NIKAN nemi Pedro itlatitlankauj Jesús, niman ikuitlapan nemij akin imiuan nouika. San ika, ¿tleka notlakuanketsa yejuin tlakatl ixpan Pedro? ¿Kipiyaj ika ijkon kichiuas? ¿Tikmatstika akinon yejuin tlakatl?

Itoka Cornelio. Yejua tlayekanketl itech soldados romanos. Cornelio xkixmati Pedro, san ika, okijlikej makinotsa niman makijli mauiyan ichan. Matikitakan kenon opanok yejuin.

Akin kachtopa onochiujkej inomachtijkauan Jesús, judíos katkaj, san ika, Cornelio xjudío katka. Yejua kitlasojtla toTajtsin, kichiuilia teoyotl niman kichiua miyek tlemach tlen kuajli ipampa oksekimej. Se teotlak kita se iluikaktekitketl tlen kijlia: ‘ToTajtsin mitstlasojtla, niman yejua kinnankilis moteoyouan. Xtlatitlani makitejtemotij se tlakatl akin itoka Pedro. Yejua nemi ipan ueyikalpan Jope, ichan Simón, akin chanti nisiu mar’.

Cornelio nimantsin kichiua yejuin. Uajmostla, Pedro nemi tlakpak ipan ikal Simón. Ompa toTajtsin kichiua ika Pedro makinemili ika kita se ueyi tlakentli tlen uajtemoua itech iluikak. Ompa nemij sesejneka noso tlatlamantikej yolkamej. Ipan itlanauatil toTajtsin, yejuin yolkamej kijtoua ika xkuajli tla kinkuaskej, san ika, kakisti se tlajtojli tlen kijlia: ‘Xmokuiteua, Pedro. Xmikti niman xkua’.

‘¡Ka!’, tlanankilia Pedro. ‘Xkeman nijkua tlen xchipauak.’ San ika, yejon tlajtojli kijlia: ‘Maka xkijto tla xchipauak tlen toTajtsin aman kijtoua ika chipauak’. Yejuin yexpa panoua. Ijkuak Pedro tlanemilijtika itech tlenon kijtosneki yejuin, ajsij ipan yejon kajli tlakamej akin Cornelio okintitlan makitejtemotij.

Pedro uajtemoua niman kimijlia: ‘Nejua akin nenkitejtemouaj. ¿Tleka onenualajkej?’ Ijkuak yejuin tlakamej kijliaj ika se iluikaktekitketl okijli Cornelio makinotsa Pedro mauiya inchan, Pedro kijtoua ika imiuan yas. Uajmostla Pedro niman akin imiuan nouika, yauej kontlajpalouaj ipan ueyikalpan Cesarea.

Cornelio yokinsentlali ichanejkauan niman akin imiuan nouika. Ijkuak yejko Pedro, Cornelio notlakuanketsa ixpan Pedro, ken nikan tikita. Pedro kijlia: ‘Xmokuiteua; nejua san nitlaltikpaktlakatl’. Kema, Biblia kijtoua ika xkuajli tla se notlakuanketsa niman tla se kiueyichiua se tlakatl. Noneki san Jehová tikueyichiuaskej.

Aman Pedro kinnojnotsa akin ompa nemij. ‘Nikita ika toTajtsin kinselia nochimej akin ika iyojlo kinekij kitekichiuiliskej’, kijtoua Pedro. Ijkuak yejua ijkon kijtotika, toTajtsin kinmaka iespíritu santo, niman akin ompa nemij peuaj tlajtoua tlatlamantik noso sesejneka tlajtoltin. Yejuin kinmojkatlachialtia judíos akin oualajkej iuan Pedro, yejuamej kineltokayaj ika toTajtsin san kinseliaya judíos. Yejuin kinmachtia ika toTajtsin kintlasojtla nochimej maski sejneka noso okse tlamantik tlachiaj, ualeuaj oksekan noso tlajtouaj okse tlajtojli. ¿Xmelak ika noneki matikilnamikikan yejuin?

Hechos 10:​1-​48; 11:​1-​18; Apocalipsis 19:​10.