PA RI wachbʼäl kawilo takʼal ri apóstol Pedro, chirij e takʼal nikʼaj rachiʼl, tekʼuriʼ ¿suche tijan kxukeʼ wajun achi chuwäch Pedro? ¿La utz kubʼan wariʼ? ¿La awetaʼm jachin laʼ?

Wajun achi are Cornelio. Ajkʼamal bʼe rech täq ajchʼoj rech Roma. Cornelio retaʼm ta uwäch Pedro, tekʼuriʼ xbʼix che, che kusikʼij pa rachoch. Chqilampeʼ suche xbʼantaj wariʼ.

Ri nabʼe täq rajtijoxel ri Jesús e judío, ri Cornelio judío täj. Tekʼuriʼ ri Cornelio kuloqʼoqʼej ri Ajawaxel, kubʼan uchʼawem rukʼ, xuqujeʼ kubʼan sibʼalaj kʼi täq utz jastaq chike ri winaq. Pa jun qʼij jun ángel xukʼut ribʼ chuwäch tekʼuriʼ xubʼij wariʼ che: ‹Ri Ajawaxel utz katrilo, rumal laʼ kuta na ri achʼawem. Chataqa utzukuxik jun achi ubʼiʼ Pedro. Kʼo pa Jope, pa rachoch Simón, kʼo che unaqaj ri nimalaj jaʼ›.

Cornelio xubʼan wariʼ chanim. Che ukabʼ qʼij, Pedro kʼo puwiʼ ri rachoch Simón. Chilaʼ ri Ajawaxel xubʼan che Pedro che kuchomaj che tijan kril jun nimalaj atzʼyaq tijan kqaj lo pa ri kaj. Chupam kʼo jalajoj uwäch täq chiköp. Pa ri utaqonik ri Ajawaxel kubʼij che wa täq chiköp e chʼajchʼoj täj rech ktijowik, tekʼuriʼ jun chʼabʼal xubʼij: ‹Chatwaljoq, Pedro. Chakamsaj tekʼuriʼ chatijaʼ›.

‹¡Kinbʼan täj!› Xchaʼ Pedro. ‹Kʼot jumul nutijom ri tzʼil täq chiköp›, tekʼuriʼ ri chʼabʼal xubʼij: ‹Xaq mabʼij tzʼil che kubʼij ri Ajawaxel kimik che chʼajchʼoj›. Wariʼ xbʼan oxibʼ mul. Chiʼ Pedro xuchomaj su kraj kubʼij wariʼ, xeʼopan pa ri ja täq achijabʼ che ri Cornelio xutaq bʼi che utzukuxik Pedro.

Pedro xqaj loq xubʼij wariʼ: ‹In waʼ ri achi tijan kitzukuj. ¿Suche kinitzukuj?› Xchaʼ. Chiʼ ri täq achijabʼ xkebʼij che jun ángel xubʼij che Cornelio che kusikʼij ri Pedro che rachoch, Pedro xubʼij che kbʼe kukʼ. Che ukabʼ qʼij, Pedro xuqujeʼ nikʼaj chik rachiʼl xebʼe che urilik ri Cornelio pa Cesarea.

Cornelio xeʼumolij ri täq ufamilia xuqujeʼ ri täq rachiʼl. Chiʼ Pedro xopanik, Cornelio xukeʼ chuwäch ri Pedro. Pedro xubʼij wariʼ: ‹Chatwaljoq; in xa inwinaq›. Jelaʼ ri Loqʼalaj Pixabʼ kukʼutu che utz täj kojxukeʼ che uyaʼik kiqʼij ri täq winaq. Rajawaxik che xaq xiw ri Jehová kqaya uqʼij.

Pedro xuya ubʼixik ri utzij ri Ajawaxel chike ri e kʼo chilaʼ. ‹Kinwilo che ri Ajawaxel utz keʼuril konojel ri winaq kkaj kkepatanej›, xchaʼ Pedro. Chiʼ tijan kchʼawik, ri Ajawaxel xuya lo rixlabʼixel, rukʼ wariʼ ri täq winaq xechʼaw pa jalajoj täq chʼabʼal. Xel kanimaʼ ri täq ajtijoxel judíos e petinäq rukʼ Pedro, che kkechomaj che ri Ajawaxel xaq xiw utz kril ri täq judíos. Wariʼ xukʼut chike che ri Ajawaxel kraj ta jun chik tinamit xa rumal che xa utz o xa nim ubʼantajik. ¿La utz che ksach ta pa qajolom wariʼ?