KO TE apotetoro ko Petero tera e tu ra i ko, e tetai o tona au oa i muri iaia. Inara eaa teia tangata i tupou ei ki mua ia Petero? Ka tau ainei aia kia rave i te reira? Kua kite koe e koai aia?

Ko Korenelio teia tangata. E rangatira vaeau Roma aia. Kare a Korenelio i kite ia Petero, inara kua akakiteia kiaia kia pati iaia ki ko i tona are. Ka akara ana tatou e i akapeea teia i tupu ei.

E ngati Iuda te au pipi mua a Iesu, inara kare a Korenelio i te ngati Iuda. Tera ra e inangaro ana aia i te Atua, e pure ana aia kiaia, e e takinga meitaki ana aia i te tangata. I na, i tetai avatea aiai kua kite atu aia i tetai angera tei karanga mai e: ‘Kua mareka te Atua ia koe, e ka pau mai aia i taau au pure. E tono koe i tetai au tangata kia tiki mai i tetai tangata ko Petero tona ingoa. Te noo ra aia i Iopa i ko i te are o Simona, i te pae tai.’

Te reira taime rai, kua tono atu a Korenelio i tetai au tangata i te kimi ia Petero. Tera mai ra, te vaitata anga atu te au tangata ki Iopa, tei runga a Petero i te tauu paraaraa o te are o Simona. I runga i te are, kua maani te Atua ia Petero kia manako e te kite atura aia i tetai kakau maatamaata e eke maira mei te rangi. Tei roto i te kakau te au tu manu tukeke pouroa. Kia tau ki te ture a te Atua, e au manu viivii teia i te kai, tera ra kua karanga mai tetai reo e: ‘Petero, e tu ki runga. Ka ta e ka kai.’

‘Kare!’ i pau atu ei a Petero. ‘Kare roa au i kai ana i te mea viivii.’ Inara kua akakite mai te reo kia Petero e: ‘Auraka e kapiki i te mea ma ki te Atua e, e mea viivii.’ Kua tupu teia e toru taime. Ia Petero e akamanako ra i te aiteanga o teia au mea pouroa, kua tae mai te au tangata tei tonoia mai e Korenelio ki ko i te are e kua ui ia Petero.

Kua eke mai a Petero ki raro e kua karanga e: ‘Ko au te tangata ta kotou e kimi nei. Eaa kotou i aere mai ei?’ I te akamarama anga atu te au tangata e kua akakite tetai angera kia Korenelio kia pati ia Petero ki ko i tona are, kua akatika a Petero i te aru ia ratou. Tera mai ra kua aere atu a Petero e tona au oa i te aravei ia Korenelio i Kaisarea.

Kua akaputuputu mai a Korenelio i tona kopu tangata e tona au oa piri vaitata. Te tae anga mai a Petero, kua aravei atu a Korenelio iaia. Kua akatopa aia iaia ki raro e kua tupou atu ki mua i te nga vaevae o Petero, mei taau e kite ra i konei. Inara karanga atu a Petero e: ‘E tu ki runga; e tangata ua rai oki au nei.’ Ae, te akaari maira te Pipiria e kare i te mea tika te tupou e te akamori i tetai tangata. Ko Iehova anake ua ta tatou ka akamori.

Teianei kua tutu aere atu a Petero ki te aronga tei akaputuputuia mai. ‘Te kite nei au e kua ariki te Atua i te au tangata pouroa e inangaro ra i te tavini iaia,’ i karanga ai a Petero. E iaia e tuatua ra, kua tuku mai te Atua i tona vaerua tapu, e kua akamata te tangata i te tuatua i te au reo ke. Kua umere tikai te au pipi ngati Iuda tei aru mai ia Petero, no te mea kua manako ratou e te ariki ua ra te Atua i te ngati Iuda anake ua. No reira te apii ra teia ia ratou e, kare te Atua e akara ana i te tangata o tetai ua atu iti tangata e e meitaki atu me kore e puapinga atu ki te Atua i te tangata o tetai ua atu iti tangata. Kare ainei te reira i te apinga meitaki kia akamaara tatou pouroa?