KUNI uurre noohu hawaariya Pheexiroosiiti; isira badheenni noori kayinni jaallasiiti. Kuni manchi Pheexiroosira sagadanni noohu mayiraatikka? Sagada hasiissannosi? Isi ayeetiro ati afootto?

Kuni manchi Qornelewoosiiti. Isi Roomu wottaaddarira roorrichchaho. Qornelewoosi Pheexiroosi diegennino; ikkollana iso minisira woshshanno gede kulloonnisi. Kuni hiitto ikke ikkinoro hanni laˈno.

Umo Yesuusa harunsitinori Yihudu mannaati; Qornelewoosi kayinni Yihudu manni wido diˈˈikkino. Ikkollana isi Magano baxanno; huuccattono assiranno; qoleno mannaho danchare assanno. Mitto barra mittu sokkaanchi isiwa mare togo yiisi: ‘Ati assoottorinni Maganu hagiidhino; konni daafira huuccattokkira dawaro qolaraati. Manna sokke Pheexiroosi yinanni mancho woshshi. Isi Iyyoophphete baaru mule heeˈrannohuwa Simiooni mine no.’

Qornelewoosi hakkawotenni Pheexiroosi woshshanno gede manna soyi. Soyino manni layinki barra Iyyoophphe iilla rahanno wote, Pheexiroosi Simiooni mine fooqete no. Hakkiichcho Maganu Pheexiroosira lowo uddano lawannorichchi iiminni daanna leellishisi. Uddanote aana duuchchu dani saada no. Maganu seeri garinni, tini saada itate keeraano diˈˈikkitino. Ikkollana mitte huuro Pheexiroosi, ‘Gotti yite gorrite iti’ yitusi.

Pheexiroosino, ‘Diˈˈiteemmo! Keeraaˈminokkire horonta ite diegennoommo’ yee qoli. Huuro kayinni Pheexiroosi, ‘Maganu xa keeraanchoho yiinoha ati dikeeraanchoho yitooti’ yitusi. Huuro sase higge hatto yitusi. Pheexiroosi, kuni coyi maatikka yaanni huluullamanni heeˈreenna, Qornelewoosi soyino manni iille Pheexiroosi nootanna teˈee xaˈmi.

Pheexiroosi fooqetenni dirre hakkonne manna, ‘Hassinanni manchi aneeti. Mayira dagginoonni?’ yiinsa. Insano Qornelewoosi iso minisira woshshanno gede sokkaanchu kulinosita kultusi; hakkiinnino Pheexiroosi ledonsa haˈrara maahoyye yii. Layinki barra Pheexiroosinna jaallasi Qornelewoosiwa Qeesaariya hadhu.

Qornelewoosi fiixasinna jaallasi gamba assire agaranni no. Pheexiroosi marita, Qornelewoosi fule haarisi. Koye misilete aana laˈˈattonte gede, Qornelewoosi uulla uwe Pheexiroosira sagadi. Pheexiroosi kayinni, ‘Gotti yii; anino mannahollana’ yiisi. Addaho, Qullaawu Maxaafi mannaho sagadanna manna magansiˈra gara ikkitinokkita kulanno. Konni daafira Yihowa calla magansiˈra hasiissannonke.

Hakkiinnino Pheexiroosi gamba yiino mannira farciˈra hanafi. Togo yii: ‘Maganu isira soqqama hasiˈranno manna baala baxannota xa huwatummo.’ Pheexiroosi coyiˈranni heeˈreenna, Maganu qullaawa ayyaanasi dirrisi. Mannuno babbaxxino qaalinni coyiˈri. Kuni coyi Pheexiroosi ledo daggurira Yihudoota ikkitino rosaanora xagge ikkinsa; korkaatuno insa Maganu Yihudoota calla baxanno yite heddino. Konni daafira tini rosaano, Maganu mitto sircho wolunni roorse laˈˈannokkita, qoleno mitto sircho roorse baxannokkita tenne ikkitonni affu. Ninke baalinke tenne afa dihasiissannonke?