NGUMPHOSTOLI Phetro lona lomile lapha, kantsi laba labangemuva kwakhe ngulabanye bebangani bakhe. Kodvwa kungani lendvodza iguce embikwaPhetro? Kufanele yini ikwente loku? Uyayati kutsi ingubani?

Lendvodza nguKhoneliyuse. Iyindvuna yelibutfo lemaRoma. Khoneliyuse abengamati Phetro, kodvwa watjelwa kutsi ammemele endlini yakhe. Ase sibone kutsi loku kwenteka njani.

Balandzeli baJesu bekucala kwakungemaJuda, kodvwa Khoneliyuse yena abengesuye umJuda. Abemtsandza Nkulunkulu, athandaza kuye, futsi asita bantfu labanyenti labahluphekile. Ngalelinye lilanga sekunguntsambama, ingilosi yefika kuye yatsi: ‘Nkulunkulu uyajabula ngawe, futsi utayiphendvula imithandazo yakho. Ngako tfumela emadvodza eJopha ayewubita indvodza letsite lebitwa ngekutsi nguPhero. Uhlala eJopha emtini waSimoni lohlala ngaselwandle.’

Ngaso leso sikhatsi Khoneliyuse watfumela emadvodza kutsi ayofuna Phetro. Ngakusasa, atsi sekasondzele ngaseJopha lamadvodza, Phetro abeseluphahleni lwendlu yaSimoni. Nkulunkulu wambangela kutsi abone kwehla intfo lefanana nendvwangu lenkhulu levela ezulwini. Ekhatsi kuyo kwakukhona tonkhe tinhlobo tetilwane. Ngekusho kwemtsetfo waNkulunkulu, leto tilwane tatingcolile, futsi kwakungafanele kutsi tidliwe. Kodvwa weva livi litsi: “Sukuma Phetro. Hlaba udle.”

Phetro watsi: ‘Ngeke Nkhosi. Angizange sengiyidle intfo lengcolile.’ Livi lachubeka latsi kuye: “Ungasho kutsi kungcolile lokuhlantwe nguNkulunkulu.” Loku kwenteka tikhatsi taze taba tintsatfu. Watsi nje asemangale Phetro kutsi kwentekani, lamadvodza labetfunywe nguKhoneliyuse efika kulomuti abekuwo futsi acela kumbona.

Phetro wehla waya kulamadvodza wefika watsi: ‘Ngimi lona lenifuna kumbona. Ningifunelani?’ Amchazela kutsi ingilosi itsite kuKhoneliyuse akamemele Phetro emtini wakhe. Ngako Phetro nakakuva loku wavuma kuhamba nalamadvodza. Ngakusasa wahamba nebangani bakhe bavakashela Khoneliyuse eKhesariya.

Khoneliyuse abememe tihlobo kanye nebangani bakhe labasedvute. Watsi nje nakefika Phetro, Khoneliyuse waphuma wamhlangabeta. Waguca phasi ngemadvolo wakhotsama embikwakhe, njengoba nje umbona kulesitfombe. Kodvwa Phetro watsi: “Sukuma nami ngingumuntfu nje.” LiBhayibheli vele litsi, akukalungi kuguca phasi ngemadvolo sikhonte umuntfu. Kufanele sikhonte Jehova kuphela.

Phetro wabese ushumayela laba labanye labebativakashi taKhoneliyuse. Watsi: ‘Nembala sengibonile kutsi Nkulunkulu wemukela bonkhe bantfu labafuna kukhonta yena.’ Asakhuluma nabo, Nkulunkulu watfumela umoya wakhe longcwele, bacala labantfu bakhuluma ngetilwimi letihlukahlukene. Loku kwawamangalisa kakhulu lamaJuda labehamba naPhetro, ngoba wona abecabanga kutsi Nkulunkulu wemukela emaJuda kuphela. Kwawenta afundza kutsi Nkulunkulu akabuki kutsi usive sini nobe kutsi uncono kunalesinye sive. Akusiyo yini lena intfo lenhle lokufanele sihlale siyikhumbula?