EKIYAKIA Petero nges ebwoi, icie kopaperoke kes ngul ejaas kauke. Konye kanukinyo ekukonokinor etunganan nejai Petero? Ibusakinit nges aswam ngun? Ijeni ijo ingai bo ngesi?

Etunganan erai Korunelio. Erai ngesi ekapolokiton loka ajore naka Rome. Mam Korunelio ejeni Petero, konye elimokitai aijaun nges togoke. Angicutu ber oni epone lo ajaunotor nu.

Ikatupitok lusodit luka Yesu araas Iyudayan, Korunelio mam erai Eyudayat. Konye emin Edeke, ilipenepei da ngesi, kiswamai da nukaitim nuipu otunga. Kosawan luka apaaran, kotakanikin nges emalaika adiopepaaran kobala ebe: ‘Elakara Edeke kajo, ido elosi abongokin ailipasinei kon. Ijuka itunga aomere etunganan loenyaritai Petero. Iboie ngesi ko Yopa togo loka Simon loidunyas kangolol.’

Atipet kijuka Korunelio itunga amoun Petero. Aparan naatupakini nepe eapiarete kesi Yopa, ejai Petero kuju togo loka Simon. Kangina koinak Edeke Petero aomom ebe eanyunit ngesi aisuka ijesun kokuju. Ejaas iponesio kere luka itiang aisuka na. Ekisil loka Edeke abala ebe mam itiang lu adolit ainyam, konye kobala eporoto ebe: ‘Konyou, Petero. Koar konyam.’

Kobongokini Petero: ‘Mam cut! Mam anyamenenei ibore yenimam elai.’ Konye kotema eporoto, Petero ebe: ‘Sirikinyara ebe mam elai luitalaunit Edeke.’ Kotakanut nu irwanauni. Nape eomoomoi Petero apolou kanu kere, kodolut itunga luijukunit Korunelio ingisitos Petero.

Kijesar Petero kwap kobala ebe: ‘Eong lo lokimooto. Kanukinyo iponitotor yesi?’ Kotemasi itunga ebe abu emalaika kolimok Korunelio anyaraun Petero togoke, kocam Petero alosit kakes. Kapaaran natupakini konyout Petero ka ipaperoke aipejokin Korunelio ko Kaisarea.

Kotukokinite Korunelio ikepajan ka ipaperoke. Kedolu Petero, kisiriam Korunelio nges. Kibirokin akeje nuka Petero, kokukokin nejai nges, kwape isesenia ijo kane. Konye kotema Petero ebe: ‘Kobwo; arai eong da etunganan.’ Eebo, itodunit Ebaibuli ebe mam edolit akukonokin ka ima etunganan. Ibusakinit oni aima Yawe bon.

Kolimonok do kwana Petero ngul luatukokina. ‘Aany eong ebe ecamuut Edeke itunga kere luekotos aijanakin nges,’ ebala Petero. Naperinga nges inera, kijuk Edeke ekemoyo lokalaunan, kogeutu itunga einer kangajepa nuegelegela. Koumokis iyudayan lukeupuros ka Petero, naarai aomitos kesi ebe ekot Edeke Iyudayan bon. Aso kisisianak na kes ebe mam Edeke eseseni itunga luka ateker adiope kwape luedeparito araibo luepolok adepar itunga lukatekerin acie. Mam ngin erai ibore yen ejok oni kere aitunit?