109-нҗы хекая

Петрус Корнелиусың өйүне гелйәр

СЕН суратда Петрус ресулы ве янындакы ики достуны гөрйәңми? Ол адам нәме үчин Петрусың өңүнде дыза чөкүп дурка? Адамың өңүнде дыза чөкмек болярмы нәме? Онуң кимдигини билйәңми?

Ол адам Корнелиус. Рим гошунының йүзбашысы. Ол Петрусы танамаса-да, оны өйүне чагырды. Гел, мунуң нәдип бейле боланыны билели.

Исаның илкинҗи шәгиртлери ехудыларды. Корнелиус болса ехуды дәлди. Эмма ол Худайы сөййәрди ве оңа дога эдйәрди. Шейле-де адамлара көп ягшылык эдйәрди. Бир гүн онуң янына перишде гелйәр. Перишде оңа: «Худай сени говы гөрйәр. Ол сениң догаларыңа җогап бермекчи. Петрус атлы адамың ызындан хызматкәрлериңи ибер. Хәзир ол Яфада, деңзиң якасында яшаян Симун атлы адамың өйүнде» дийди.

Корнелиус Петрусың ызындан адам иберйәр. Эртеси хызматкәрлер Яфа геленде, Петрус Симуның тамының үстүндеди. Худай Петруса гөкден инип гелйән улы сачак гөркезйәр. Сачакда хер хили хайванлар барды. Худайың кануны боюнча олары иймек боланокды, йөне сес оңа: «Петрус, тур. Союп, олары ий» диййәр.

Петрус: «Ёк! Мен хич хачан харам зат иймәндим» диййәр. Сес болса: «Худайың арасса диййән задына харам дийме» диййәр. Сес муны үч гезек гайталаяр. Петрус гөрен задының нәме аңладяндыгы хакда ойланып дурка, Корнелиусың ёллан адамлары Симуның өйүне гелип, Петрусы сораярлар.

Петрус ашак дүшүп: «Шол гөзлейән адамыңыз мен. Нәме хызмат?» диййәр. Гелен адамлар бир перишдәниң Корнелиуса Петрусы өйүне чагырмагы айдандыгыны гүррүң берйәрлер. Петрус олары диңләп, биле гитмәге разы боляр. Эртеси гүн Петрус ве достлары Корнелиусың өйүне Кайсария гидйәрлер.

Корнелиус болса, доган-гарындашларыны, якын достларыны йыгнап, Петрусы гаршыламага чыкды. Серет, ол Петрусың өңүнде дыза чөкүп, тагзым эдйәр. Эмма Петрус оны галдырып: «Тур, менем адам» диййәр. Хава, Мукаддес Язгыларың гөркезиши ялы, адамларың өңүнде дыза чөкүп, сежде этмели дәл. Биз диңе Ехова сежде этмели.

Инди Петрус йыгнанан адамлара вагыз эдйәр. Ол адамлара йүзленип: «Гөрйән велин, Худай гуллук этмек ислейән адамларың хеммесини кабул эдйәр» диййәр. Петрус гүррүң берип дурка, Худай мукаддес рухуны иберйәр. Шол ердәки адамлар дүрли дилде гепләп башлаярлар. Петрус билен гелен ехуды шәгиртлер муңа хайран галяр, себәби олар Худай диңе ехудылары говы гөрйәндир өйдйәрдилер. Шу вакадан олар Худайың бир миллети башга миллетден ёкары тутмаяндыгына дүшүндилер. Бизем шуны ятда сакласак, говы болмазмы?

Ресулларың ишлери 10:1—48; 11:1—18; Ылхам 19:10.