ANTA unu laya apóstol Pedro, chu kxchakgen layakgolh tiku katalalin. Pero, ¿tuku xlakata uma chixku talakgatsokgostanima Pedro? ¿Tlan tuku tlawama uma chixku? ¿Katsiya tiku uma chixku?

Uma chixku xtukuwani Cornelio. Wa xapuxku soldado xalak Roma. Cornelio ni lakgapasa Pedro, pero wanika pi kaʼalh wani Pedro kamilh kxchik. Kaʼakxilhwi la lalh uma.

Wantiku xapulana kstalaninanin Jesús, li Judá pero Cornelio ni li Judá. Cornelio lu paxkiy Dios, tlawaniy oración, chu lhuwa tuku kalimakgtayay kristianos. Chu akgtum kilhtamaku tasiyanilh chatum ángel chu wanilh: Dios paxkiyan, chu xla nakgaxmata mioración. Kapit maputsinana chatum chixku xtukuwani Pedro. Wilacha kJope kxchik Simón, tiku wi xchik lakatsu kpupunu.

Cornelio lu lakapara chuna tlawalh. Lichali Pedro anta wi kxakgstin kxchik Simón. Akxni, Dios tlawalh pi kalakpuwa pi akxilhma maktum lanka lhakgat nema taktamacha kʼakgapun. Anta klhakgat xwilakgolh tanlhuwa tanu, tanu animales. Kxlimapakgsin Dios xtatsokgnit pi umakgolh animales nitlan kawakan, pero akgtum tachuwin waniy: Kataya, Pedro. Kakamakgni animales chu kawat.

¡Ni! Niktiwalh kgalhtinalh Pedro. Nikxni a kway tuku xalixkajni. Pero wantiku xakgatlima waniy: Nialh xalixkajni kawani tuku Dios wan pi nialh lixkajni. Uma makgtutu chuna lalh. Akxni Pedro xakstu xkgalhskinkan tuku wamputun uma, tama kilhtamaku chankgolh anta niku xwi Pedro, lakchixkuwin tiku kamalakgachalh Cornelio xlakata naputsakgoy.

Pedro taktalh chu wan: Akit chixku tiku putsapatit. ¿Tuku xlakata tanitantit? Akxni lakchixkuwin wanikgolh pi chatum ángel wanilh Cornelio pi kawanilh Pedro pi kamilh kxchik, Pedro wan pi nakataʼan. Lichali, Pedro chu makgapitsi tiku xtalalinkgoy ankgolh lakgapaxialhnankgoy Cornelio kCesarea.

Cornelio kamamakxtuminit xparientes chu tiku tlakg tlan katalalin. Akxni chalh Pedro, Cornelio talakgatsokgostanilh, chuna la akxilhpat kdibujo. Pero Pedro wan: Kataya, akit na kaj chixku. Chuna, Biblia wan pi ni natalakgatsokgostaniyaw chu namaxkiyaw takaknin chatum chixku. Kaj Jehová nakakninaniyaw.

Pedro kalixakgatliy xlakata Cristo tiku anta wilakgolh. Chu wan: Kaʼakxilha pi Dios kamakgamakglhtinan putum kristianos tiku skujnaniputunkgoy. Chu akxni chuna chuwinama Dios makamilh xespíritu santo chu tama kristianos tsukukgolh chuwinankgoy tanu tanu tachuwin. Uma lu kaks kamalakawanilh xtamakgalhtawakgen Jesús tiku taminkgonit Pedro, xlakpuwankgoy pi Dios kaj watiya xkapaxkiy li Israel. Uma kamasiyanilh pi Dios ni akxilha la tlakg kxtapalh o tlakg xlakaskinka makgapitsi kristianos tiku xaʼalakatanu chu tiku atanu xcolorkan. ¿Nixlikana pi lu tlan nalakapastakaw uma?