LONG dispela piksa aposel Pita na sampela pren bilong em ol i sanap i stap. Tasol bilong wanem dispela man i brukim skru long Pita? I stret em i mekim olsem? Yu save em i husat?

Dispela man em Kornilius. Em i wanpela kepten long ami bilong Rom. Kornilius i no save long Pita, tasol God i tokim em long singautim Pita i kam. Orait yumi ken stori long olsem wanem dispela samting i kamap.

Ol namba wan lain i kamap disaipel bilong Jisas ol i bilong lain Juda, tasol Kornilius i no wanpela Juda. Tasol em i laikim God, na em i save beten long em, na em i save mekim gut long ol man. Wanpela taim long apinun wanpela ensel i kam long em na i tok: ‘God i amamas long yu, na em i harim beten bilong yu. Yu mas salim sampela man i go kisim wanpela man nem bilong em Pita. Em i stap long haus bilong Saimon long Jopa, arere long solwara.’

Orait kwiktaim Kornilius i salim sampela man i go painim Pita. Long neks de, taim ol dispela man i kam klostu long Jopa, Pita i stap long rup bilong haus bilong Saimon. God i mekim na Pita i ting em i lukim wanpela bikpela laplap i lusim heven na i kam daun. Insait long laplap i gat kain kain animal. Lo bilong God i tok ol dispela animal i doti na i tambu long kaikai, tasol wanpela maus i tok: ‘Pita. Yu kilim abus na kaikai.’

Pita i tok: ‘Nogat! I no gat wanpela taim mi kaikai samting i no klin.’ Tasol dispela maus i tokim Pita: ‘Samting God i mekim i kamap klin, dispela yu no ken kolim olsem i no klin.’ Tripela taim dispela samting i kamap. Pita i tingting planti, na nau lain bilong Kornilius i kam painim em.

Pita i go daun na tok: ‘Mi dispela man yupela i wok long painim. Bilong wanem yupela i kam?’ Ol i tokim Pita olsem wanpela ensel i tokim Kornilius long singautim Pita i kam long haus bilong em, na Pita i orait long i go wantaim ol. Long neks de Pita na sampela pren ol i go lukim Kornilius long Sisaria.

Kornilius i singautim ol wanblut na pren i kam bung. Taim Pita i kam, Kornilius i brukim skru long lek bilong Pita, olsem yu lukim long piksa hia. Tasol Pita i tok: ‘Yu kirap. Mi tu mi man tasol.’ Yes, Baibel i soim olsem i no stret long brukim skru na lotuim wanpela man. Yumi mas lotuim Jehova tasol.

Orait nau Pita i autim tok long ol manmeri i bung. Em i tok: ‘Nau mi save olsem God i orait long olgeta man em ol i laik mekim wok bilong em.’ Na taim em i toktok i stap, God i salim holi spirit bilong em na ol manmeri i kirap mekim tok long kain kain tok ples. Sampela disaipel Juda ol i bin kam wantaim Pita, ol i kirap nogut long dispela samting, long wanem, ol i ting, God i laikim ol Juda tasol. Tasol nau ol i kisim save olsem God i no ting ol man bilong wanpela lain i winim ol man bilong narapela lain. Em gutpela samting yumi olgeta i mas tingim, a?