БО дээрге апостол Пётр-дыр, а ооң артында — ооң ийи эжи-дир. Ынчалза-даа чүге бо кижи Пётрнуң мурнунда дискектенип алган турары ол? Ынчап болур чүве бе? Бо кижи кымыл, билир сен бе?

Ол дээрге Корни́лий-дир. Римниң чүс шериг баштыңчызы-дыр. Корни́лий Пётр-биле таныш эвес, ынчалза-даа ону бажыңынче чалап алыр дужаал алган. Ол канчаар болганын, билип алыылам, че.

Иисустуң бир дугаар өөреникчилери иуде́йлер турган, а Корни́лий иуде́й эвес. Ынчалза-даа ол Бурганга ынак, аңаа мөргүп, база кижилерге хөй эки чүвени кылып турган. Бир катап хүндүс ооң мурнунга дээрниң төлээзи көстүп келгеш дыңнаткан: ‘Сен Бурганга таарымчалыг сен, ынчангаш ол сээң мөргүлдериңге харыылаар күзелдиг. Чалчаларыңны Пётр деп аттыг кижиже чоргузувут. Ам ол Иоппияда, далай чанында чурттап турар Си́моннуң бажыңында’.

Корни́лий ол-ла дораан Пётрже улузун чорудупкан. Дараазында хүн чалчалар Иоппияга чедип кээрге, Пётр Си́моннуң бажыңының калбак крышазының кырынга турган. Пётрнуң угаан-сагыжынга Бурган дээрден бадып олурар улуг шывыг көргүскен. Ында чүзүн-баазын амытаннар бар. Бурганның хоойлузу-биле ол амытаннар чем болурунга арыг эвес деп санаттынып турган-даа болза, үн Пётрга дужааган: ‘Пётр, туруп кел. Соккаш, чи’.

— Чок!— деп, Пётр алгырган.— Кажан-даа арыг эвес чүве чивээн мен.— Ынчалза-даа Пётрга үн харыылаан: ‘Бурганның ам арыг деп чарлап турар чүүлүн моон соңгаар арыг эвес диве’. Пётр-биле үн үш катап чугаажып турар. Ол бүгү чүү уткалыг ирги деп, Пётр аайын тыппайн турда, бажыңынче Корни́лийден кижилер келгеш, Пётрну айтырып турар.

Пётр дүжүп келгеш чугаалаан: ‘Мен-дир мен. Чүнү күзеп тур силер?’ Дээрниң төлээзи Корни́лийге бажыңыңче Пётрну чалап ал дээнин олар тайылбырлаарга, Пётр баар кылдыр чөпшээрешкен. Дараазында хүн Пётр биле ооң каш өөрү Кесарияда Корни́лийже чорупкан.

А Корни́лий төрелдерин база чоок эштерин чыып алган. Оон Пётрну уткуп үнүп келген. Көрем — Пётрнуң мурнунга ол дискек кырынга барып дүшкеш, ооң буттарынче сөгүрген. Ынчалза-даа Пётр удурланган: ‘Туруп кел. Мен — анаа кижи ышкажыгай мен’. Ийе, Библия көргүзүп турар — кижи мурнунга дискек кырынга туруп алгаш, аңаа чүдүп болбас. Чүгле Иеговага чүдүүрү чогуур.

Ам Пётр шупту чыылган улуска суртаал кылып турар. ‘Көрүп тур мен, Бурган аңаа бараалгаарын күзеп турар кижилерни шуптузун хүлээп алыр’,— деп, Пётр бодунуң чугаазын эгелээн. А кажан ол чугаазын уламчылап турда, Бурган ыдыктыг күжүн чоргускан болгаш, кижилер янзы-бүрү дылдарга чугаалажып эгелээн. Пётр-биле келген иуде́й өөреникчилер кайгап калган —Бурган чүгле иуде́йлерге ээ көрнүр деп, олар бодап турган болгай. Ынчангаш моон олар билип алганнар, кандыг-ла бир раса өске расаның кижилеринден дээре болгаш бедик деп, Бурган санавайн турар. Биске база ооң дугайында кезээде сактып чорууру ажыктыг эвес-тир бе?