TE MACHʼA tekʼel ya awile jaʼ te jpuk kʼop Pedro, te machʼatik ayik ta spate jaʼ sjoʼtak. Jaʼukmeto, ¿bin yuʼun te la skejan sba ta stojol Pedro te winik ini? ¿Lekbal te jich la spase? ¿Yabal anaʼ machʼa-a?

Cornelio sbiil te winike, jaʼ jtul capitán yuʼun soldadoetik ta Roma. Te Cornelioe maba ya snaʼbey sba te Pedroe, jaʼukmeto la yichʼ albeyel te akʼa yikʼ tal ta snae. Yame kiltik bael te bin utʼil kʼot ta pasel ini.

Spisil judioetik-a te sbabial jnopojeletik yuʼun te Jesuse, jaʼukmeto maba judío stukel te Cornelioe. Jaʼnax yuʼun te kʼux ta yoʼtan te Diose, sok ya skʼopon soknix bayal bintik lek spasoj ta stojol te ants winiketike. Ta mal kʼajkʼal chiknaj jtul chʼul abat ta stojol sok jich albot yuʼun: Lek yoʼtan Dios awuʼun sok yame yakʼbat te bin akʼanojbeye. Tikuna tal ta leel jtul winik te Pedro sbiile. Ay ta Jope, ta banti sna te Simón te ay ta tiʼ mare.

Jich la spas ta oranax te Cornelioe. Ta yan kʼajkʼal, te Pedro ay ta sba yamakʼul sna te Simone. Tey akʼbot yil yuʼun Dios jun mukʼul pakʼ te yak ta koel tal ta chʼulchane. Ay bayal ta chajp chambalametik tey-a. Ta swenta te bin yaloj te ley yuʼun te Diose, te chambalametik ini ma lekuk skʼoplalik jich ma xjuʼ ta weʼel, jaʼukmeto ay machʼa jich kʼopoj: Jajchan, Pedro. Mila atiʼ.

Jich la yal te Pedroe: ¡Maʼuk!, maʼyuk jtiʼoj te bintik ma lekuk skʼoplale. Jich chaʼalbot yuʼun te machʼa yak ta kʼope: Ma xawal te ma lekuk te bin lekubenix yuʼun te Diose. Oxeb buelta kʼot ta pasel ini. Te kʼalal yak ta sjojkʼoybel sba-a te Pedro te bin swentail ini. Tey-abi kʼotik ta na te winiketik te tikumbilik tal yuʼun te Cornelio ta sleel te Pedroe.

Ko tal te Pedro sok jich la yal: Joʼon te machʼa yak alebelike. ¿Bin swentail te talexe? Te kʼalal te winiketik la yalik te jtul chʼul abat albot yuʼun te Cornelio te yakuk yikʼ tal te Pedro ta banti te snae, jaʼ yuʼun la yal te Pedro te ya xbajtʼ sok te winiketike. Ta yan kʼajkʼal, te Pedro sok te sjoʼtake bajtʼik ta yulaʼtayel te Cornelio te ay ta Cesarea.

Stsobojix spisil-a te machʼatik ay yuʼun te Cornelioe soknix te yamigotak te kʼax lek yiloj sbaik soke. Te kʼalal kʼot te Pedroe te Cornelio la skejan sba ta stojol, jich bitʼil ya awil liʼ ini. Jaʼukmeto jich la yal te Pedro: Tejkʼan aba, melel winikon euk. Te Biblia jamal ya yal te ma lekuk te ya jnijan jbatik ta yichʼel ta mukʼ jtul winik jich bitʼil Dios. Jaʼnax ya skʼan ya kichʼtik ta mukʼ te Jehovae.

Jich te Pedro la scholbey skʼop Dios yaʼiy te machʼatik tey ayik-ae, jich la yal: Kʼotix ta koʼtan te lek ya yil Dios spisil te ants winiketik jaʼnax teme ya spasbeyik te skʼanojel yoʼtane. Te kʼalal yak ta kʼop-a te Pedroe, te Dios la stikun tal te schʼul espíritu te jich jajchik ta kʼop ta yanyantik kʼopiletik te ants winiketike. Chamnax la yaʼiyik te jnopojel judioetik te sjokinejik bael te Pedroe, la skuyik te jaʼnax kʼambil yuʼun Dios te judioetike. Jich akʼbot yilik te maba jchajpnax tsʼumbalil te kʼax mukʼxan skʼoplal ta yoʼtan te Diose. ¡Mame skʼan te ya schʼay ta koʼtantik te bitʼil maʼyuk machʼa ya stsa te Diose!