ULUME u wa talama ndeti palo, upostolo Petulu. Alume ava va kasi konyima akamba vaye. Momo lie ulume u a kasilili oku kekamẽla Petulu? Anga hẽ eci ca sunguluka? Ove wa kũlĩha ulume waco?

Onduko yaye Korneliu. Eye kesongo liolohoka vio Roma. Korneliu ka kũlĩhĩle Petulu, pole wo laleka oco a ende konjo yaye. Tu konomuisi eci ceya oku pita.

Olondonge viatete via Yesu via kala va Yudea, pole Korneliu ka kaile u Yudea. Eye wa solele Suku, wa enda oku likutilila kokuaye. Kuenda wa lingaile ovina viwa komanu. Eteke limue kekumbi, ungelo wa moleha kokuaye kuenje wa popia laye hati: ‘Suku wa yeva olohutililo viove kuenda oka vi tambulula. Tuma alume oco va kope ulume umue o tukuiwa Petulu. Eye okasi ko Yopa konjo ya Simono, ocipepi lokalunga.’

Korneliu wa tuma oku sandiliya Petulu. Keteke likuavo, eci alume va kala ocipepi limbo lio Yopa, Petulu wa kala kilu lionjo ya Simono. Suku wa muisa Petulu vocinjonde onanga yimue yinene ya loka kilu. Vonanga yaco mua kala ovinyama viosi. Vocihandeleko ca Suku, ovinyama viaco viosi via vĩha oku vilia. Kuenje wa yeva ondaka ya popia hati: ‘A Petulu votoka. Vi ponda kuenda lia.’

Petulu wa kumbulula hati: ‘Sio! Ame sia la lia cimue ca vĩha.’ Petulu wa yeva ondaka ya popia hati: ‘Ca yelisa Suku kuka ci tukule ca ño.’ Eci ca pita olonjanja vitatu. Osimbu Petulu a kala loku sokolola eci a mola vocinjonde, alume va tumiwa la Korneliu va pitĩla konjo kuenda va pulisa Petulu.

Petulu wa loka kilu lionjo kuenda wa popia hati: ‘Ame muẽle vu kasi loku mbanjiliya. Weyilili nye?’ Eci alume vo sapuila okuti ungelo wa popia la Korneliu oco a laleke Petulu konjo yaye, Petulu wa tava oku enda lavo. Keteke likuavo Petulu lakamba vaye va enda oku pasuisa Korneliu ko Kaisarea.

Korneliu wongolola epata liaye kuenda akamba vaye va velapo. Eci Petulu eya, Korneliu wa enda oku tokekela laye. Kuenje wo kekamẽla, ndomo ocilete vociluvialuvia. Pole, Petulu wa popia hati: ‘Votoka. Lamevo ndulume.’ Embimbiliya li lekisa okuti, ka ca sungulukile oku kekamẽla omunu. Tu kuete lika oku fendela Yehova.

Petulu okasi oku kundila vosi vana va liongolola. Petulu wa popia hati: ‘Nda limbuka okuti Suku o tava omanu vosi va yongola oku u vumba.’ Osimbu eye a kala loku vangula, Suku wa tuma espiritu sandu. Kuenje omanu va fetika oku vangula alimi a litepa. Eci ca komõhisa olondonge va Yudea vana veyile la Petulu momo ovo va simile okuti Suku o kuetele lika ohenda va Yudea. Eci ca va longisa okuti Suku ka tendi ekova lalimue okuti olio lia velapo likuavo li sule. Eci ocina cimue vosi yetu tu kuete oku ivaluka.

Ovilinga 10:1-48; 11:1-18; Esituluilo 19:10.