Tantara 109

Petera Namangy Kornelio

APOSTOLY Petera mitsangana io. Olo aby afaranany io kamaradiny. Nan̈ino ma lelahy io mankôhoko amy Petera? Mety edy zen̈y va? Hainao azôvy lelahy io?

Kornelio an̈aran̈a lelahy io. Izy sefon’ny maramila romanin̈y. Kornelio tsy nahay Petera foeky, fa Petera nataony karibo an-tran̈o. Alô atsika hizaha karakôry nahavy zen̈y.

Mpianatra Jesosy voanalohany baka Jiosy aby, kanefa Kornelio tsy Jiosy. Izy tia Zan̈ahary, mivavaka aminany, baka iô izy tsara fan̈ahy amin’olo. Ke andra araiky, folakandra tamy zen̈y, nisy anjely niboaka taminany, nivolan̈a kara’ty: ‘Zan̈ahary mankasitraka anao, ke izy hamaly vavakanao. Iraha olonao sasany mikaiky Petera. Izy mipetraka Jopa, amy tran̈on’i Simona maridrikitry ranomasin̈y.’

Niaraka tamy zen̈y, Kornelio nan̈irak’olo hitady Petera. Amarain’izin̈y, olo aby io koa navy marikitry Jopa, Petera tan̈abo etazin’ny tran̈on’i Simona. Tiô Zan̈ahary nampahita Petera lamba lava nijotso boaka tan-dan̈itry. Karazan̈a biby jiaby tan̈aty tao. Tamy lalàn̈a namian’ny Zan̈ahary baka, biby aby io maloto, ke tsy mahazo hahanin̈y, kanefa nisy fiô nivolan̈a: ‘Petera, mitsangàna. Vonia biby aby io, baka iô ahana.’

Petera namaly: ‘Zaho baka tsy hihina raha maloto aby io e!’ Fa fiô in̈y nivolan̈a tamy Petera: ‘Aza atao maloto raha fa nidiovin’ny Zan̈ahary.’ Intelo aby raha zen̈y nandalo. Petera mbala nieritreritry dikan’ny raha jiaby zen̈y fo, olon’i Kornelio aby in̈y navy hitady izy.

Petera nijotso, sady nivolan̈a: ‘Zaho ty. Kabaronarô?’ Irô koa fa nan̈azava fa nisy anjely araiky nivolan̈a tamy Kornelio hikaiky izy, Petera nan̈eky handeha an̈y. Amarain’izin̈y, Petera ndreky kamaradiny nandeha tamy Kornelio ta Kaisaria tan̈y.

Kornelio tamin’io namory ry havany ndreky kamaradiny marikitry. Petera koa fa navy tan̈y, Kornelio nitsena izy. Izy nankôhoko tamy vitin’i Petera, karaha amy sary io. Fa volan̈in’i Petera: ‘Mitsangàna anao, fa zaho kony olo miran̈a anao fo!’ Baiboly mivolan̈a fa fady mankôhoko ndreky mivavaka amin’olo. Jehovah zaraiky fo tôkony hivavahatsika.

Petera amy zay nampianatra irô jiaby. Volan̈in’i Petera: ‘Zaho iziô mahay fa tian’ny Zan̈ahary zay olo ti hanompo izy.’ Izy koa fa boaka nivolan̈a zen̈y, Zan̈ahary nandefa fan̈ahy masin̈inany. Tiô fo irô nahay volan̈a tsy nin-drô. Gaga Jiosy niaraka tamy Petera aby io nahita zen̈y, fôtony irô nieritreritry fa Jiosy zaraiky fo iken’ny Zan̈ahary. Raha jiaby zen̈y nampianatra irô fa Zan̈ahary tsy man̈avakavaka karazan’olo, aminany miran̈a fo olo jiaby. Tsy tôkony hadin̈atsika raha zen̈y, sa karakôry?

Asan’ny Apostoly 10:1-48; 11:1-18; Apokalypsy 19:10.