JWAJIMI pelepojo ali ndumetume Petulo, ŵali kunyumawo ali acimjakwe. Nambo ligongo cici mundu jwinejo akumtindiŵalila Petulo? Ana jwalakwejo akusosekwa kutenda yeleyo? Ana akummanyilila kuti ali nduni?

Munduju ali Koneliyo. Jwalakwe ali msilikali jwa Ciloma. Koneliyo ngakummanyilila Petulo, nambo jwalakwe ŵamsalile kuti am’ŵilanje Petulo kunyumba jakwe. Kwende tulole muyatendecele yeleyi.

Ŵakumkuya Yesu ŵandanda ŵaliji Ayuda, nambo Koneliyo nganaŵa m’Yuda. Nambope jwalakwe akusamnonyela Mlungu, akusapopela kwa Mlungu, soni akusatenda yindu yejinji pakwakamucisya ŵane. Lisiku line musi lilayika likwisa kwa jwalakwe, nikuŵeceta kuti: ‘Mlungu akusangalala namwe, soni jwalakwe cajanje mapopelo genu. Mwatumisye acalume ŵane kuti akamjigale mundu jwine jwakolanjikwa Petulo. Jwalakwejo akutama ku Yopa kunyumba ja Simoni, jwakutama mungulugulu nyasa.

Ndaŵi jijojo Koneliyo akwatuma acalume ŵane kuti akawonegane ni Petulo. Lisiku lyakuyicisya acalumewo pakuŵandicila ku Yopa, Petulo ali pamsakasa wa nyumba ja Simoni. Ali pelepo Mlungu akumtendekasya Petulo kuganisya kuti akuciwona cinguwo cekulungwa cili mkutuluka kutyocela kwinani. Pacinguwopo pana yinyama yakulekanganalekangana. Nambo mwakamulana ni malamusi ga Mlungu yinyama yeleyi yaliji yakulya yangalumbana, nambope maloŵe gakupikanika gakuti: ‘Mjimuce Petulo. M’wulaje, soni mlye.’

Petulo akwanga kuti: ‘Iyayi! Une nganindyeje cangalumbana.’ Nambo maloŵe gala gakumsalila Petulo kuti: ‘Mlece kuyikolanga kuŵa yangalumbana yindu yele Mlungu akuti yili yakulumbana.’ Yeleyi yikutendekwa maulendo gakwana gatatu. Petulo pakusimonga kuti yeleyi yikugopolela cici, acalume ŵaŵatumile Koneliyo ŵala akukopocela pa nyumbapo ni akuwusya ya Petulo.

Petulo akutuluka pamsakasa pala nikuŵeceta kuti: ‘Mundu jwakumsakajo ni une. Ayicile cici?’ Jemanja jila pasasile kuti lilayika lyamsalile Koneliyo kuti am’ŵilanje Petulo kunyumba jakwe, Petulo akwitika yakwawula nawo. Lisiku lyakuyicisya Petulo ni acimjakwe akwawula kwa Koneliyo ku Kaisaliya.

Koneliyo asongangenye acanasi ŵakwe, soni acimjakwe mnope. Payice Petulo, Koneliyo akusimana najo. Jwalakwe akumtindiŵalila Petulo, mpela mwatukuyiwonela apanomu. Nambo Petulo akuŵeceta kuti: ‘Jimani, Unesoni ngambile kuŵa mundu.’ Baibulo jikusasala kuti ngaŵa yakuŵajilwa kumtindiŵalila mundu ni kumlambila. Tukusosekwa kumlambila Yehofape.

Sambano Petulo akwalalicila ŵandu ŵasongangene ŵala. Ni jwalakwe akuŵeceta kuti: ‘Nayiweni kuti Mlungu akusapocela ŵandu wosope ŵakusaka kumtumicila.’ Paŵaliji ciŵela kuŵeceta, Mlungu akutumisya msimu weswela, ni ŵandu ŵala akutanda kuŵeceta yiŵeceto yakulekanganalekangana. Yeleyi yikwasimonjesya ŵakulijiganya ŵa Ciyuda ŵayice yalumo ni Petulo ŵala, ligongo jemanjajo ŵaganisyaga kuti Mlungu akusiŵanonyela Ayudape. Sambano yeleyi yikwakamucisya kumanyilila kuti Mlungu ngakusiŵawona ŵandu ŵa mtundu wine kuŵa ŵambone kapena ŵakusosekwa mnope kupundana ni ŵandu ŵa mitundu jine. Ana yeleyi ngaŵa yindu yambone yatukusosekwa kuyikumbucilaga wosope?