GBANFLƐN nga amun wun i nin Pɔlu yɛ’n, ɔ suan Timote. Timote nin i awlobofuɛ’m be tran Listri. Be flɛ i nin’n kɛ Enisi yɛ be flɛ i nannan bla’n kɛ Loisi.

Pɔlu i Listri balɛ’n, i kpɛ nsan su yɛ. Pɔlu nin Barnabasi be tuli ajalɛ be bali Listri jasin fɛ’n bolɛ’n, i afuɛ kun yɛ. Yɛ siɛn’n, Pɔlu nin i janvuɛ Silasi b’a sa be sin wa ekun.

?Amun si ndɛ nga Pɔlu su kan kle Timote’n? Ɔ su usɛ i kɛ: ‘?A kunndɛ kɛ a nin Silasi nin min bé kɔ́? A kwla uka e jasin fɛ’n i bolɛ nun nvlenvle’m be nun.’

Timote seli kɛ: ‘Ɛɛn, n nin amun é kɔ́.’ Ɔ maan Timote yacili i awlobofuɛ mun naan ɔ nin Pɔlu nin Silasi b’a ɔ likawlɛ. Sanngɛ ka naan y’a kan be ajalɛ tɛnndɛn nga bé wá tú i lɛ’n i ndɛ’n, maan e nian sa nga ɔ́ wá jú Pɔlu su’n. Kɛ Zezi fiteli Pɔlu ɲrun Damasi atin’n su’n, i afuɛ blu nin nso (17) yɛ.

Nán amun wla fi su kɛ Pɔlu bali Damasi Zezi i sɔnnzɔnfuɛ’m be ɲrɛnnɛn klelɛ, sanngɛ i bɔbɔ’n wa yoli Zezi i sɔnnzɔnfuɛ wie siɛn’n! I sin’n, Pɔlu i kpɔfuɛ’m be wa cicili kɛ bé kún i, afin be kloman Zezi i su jasin fɛ’n nga ɔ bo’n. Sanngɛ Zezi i sɔnnzɔnfuɛ’m be yoli maan Pɔlu kwla wanndili. Be fɛli i be wlali gbogbo kun nun naan b’a jrɛ i klɔ i wun talɛ nga be sili’n i sin lɔ.

I sin ekun’n, Pɔlu ɔli Antiɔsu jasin fɛ’n bolɛ. Antiɔsu lɔ yɛ be boli Zezi i sɔnnzɔnfuɛ’m be Klistfuɛ’n flɛlɛ’n i bo ɔ. Siɛn’n b’a sunman Pɔlu nin Barnabasi kɛ be tu ajalɛ be wɔ nvle mmuammua kpa’m be su be ko bo jasin fɛ’n. Klɔ sɔ’m be nun kun yɛle Listri, Timote i klɔ’n.

Siɛn’n, afuɛ ko ju kun bɔɔ w’a sin, Pɔlu w’a sɛ i sin Listri wa ekun. ?Kɛ Timote nin Pɔlu nin Silasi be tuli ajalɛ’n, amun si lika nga be ɔli’n? Amun e nian lika nga be jɛjɛli i desɛn’n su naan e suan klɔ ngalɛ’m be nun wie’m be dunman.

I klikli nun’n, be ɔli klɔ kun m’ɔ o Ikoni i wun lɛ’n su, kpɛkun be ɔli klɔ uflɛ kun mɔ be flɛ i Antiɔsu wie’n, i su. I sin’n, be ɔli Troasi nin Filipu, ɔ nin Tɛsaloniki, yɛ Bere. ?Amun wun Atɛni lika nga be jɛjɛli i desɛn’n su lɛ’n su? Pɔlu boli jasin fɛ’n lɔ wie. I sin’n, be boli jasin fɛ’n Korɛnti lɔ afuɛ kun nin sin. Kɛ ɔ yoli’n, be kali Efɛzi lɛ kan. Kpɛkun be fali mmeli be fa sali be sin Sezare, naan b’a tu ajalɛ b’a ɔ Antiɔsu, lɔ yɛ Pɔlu kali ɔ.

Ɔ maan Timote tuli ajalɛ kilo akpiakpi mun ɔli nvle’m be nun, ɔ ukali Pɔlu “jasin fɛ’n” bolɛ’n nun, yɛ be takali Klistfuɛ asɔnun kpanngban kpa. ?Kɛ á wá yó kpɛnngbɛn’n, á kúnndɛ yó Ɲanmiɛn i sufuɛ kpa nga ɔ lafi Ɲanmiɛn su kɛ Timote sa?