Maana 110nan

Timote ye Paul dɛmɛbaga kura ye

I ƝƐ bɛ kamalennin min na ni ciden Paul ye, o ye Timote de ye. Timote ni a somɔgɔw sigilen bɛ Lisitre. A ba tɔgɔ ko Unise, a mɔmuso tɔgɔ ko Lois.

Nin ye a siɲɛ sabanan ye ko Paul nana bɔ Lisitre. Siɲɛ fɔlɔ min na Paul ni Barnabasi tun nana Lisitre waajuli taama dɔ sɛnfɛ, o bɛ san kelen ni kɔ ɲɔgɔn bɔ. Sisan Paul seginna ka na tuguni ni a terikɛ Silasi ye.

I b’a dɔn Paul bɛ ka min fɔ Timote ye wa? Paul y’a ɲininka ko: ‘Yala i b’a fɛ ka fara Silasi ni ne kan wa? I bɛna se k’an dɛmɛ ka mɔgɔw waaju minnu bɛ yɔrɔ janw na.’

Timote y’a jaabi ko: ‘Ɔwɔ, ne b’a fɛ ka taa.’ Dɔɔnin dɔrɔn o kɔfɛ, Timote bɔra a somɔgɔw kɔrɔ, ka taa Paul ni Silasi kɔ. Nka, sani an ka kuma u ka taama ko la, an ka fɔlɔ k’a lajɛ fɛn min ye Paul sɔrɔ. A bɛ san 17 bɔ, kabini Yesu tun y’a yɛrɛ jira a la Damasi sira kan .

I hakili to a la ko Paul tun nana Damasi walisa ka Yesu ka kalandenw tɔɔrɔ. Nka Paul yɛrɛ de kɛra sisan Yesu ka kalanden ye. Kɔfɛ, Paul jugu dɔw tun b’a fɛ ka a faga, bawo a bɛ waajuli min kɛ Yesu ko la, o tun man di u ye. Nka, kalandenw ye Paul dɛmɛ a ka boli ka taa. U y’a don segi dɔ kɔnɔ, ka o lajigin dugu kogoba fɛ.

O ko kɔfɛ, Paul taara waajuli kɛ Antiose. Yesu ka kalandenw welela siɲɛ fɔlɔ min na ko  Krecɛnw, o kɛra o dugu de la. Paul ni Barnabasi cira ka bɔ Antiose ka taa waajuli taama na jamana janw na. U taara dugu minnu na, olu dɔ la kelen ye Lisitre ye, Timote tun sigilen bɛ dugu min na.

San kelen ɲɔgɔn tɛmɛnen kɔ, Paul seginna sisan ka na Lisitre, u ka taama filanan kɔnɔna na. Tuma min na Timote taara Paul ni Silasi nɔfɛ, yala i b’a dɔn u taara yɔrɔ min na wa? Dugukolo ja lajɛ, ani an ka fɛn dɔw kalan olu la.

A fɔlɔ, u taara u kɛrɛfɛdugu dɔ la, n’o ye Ikonɛ ye. O kɔ, u taara dugu filanan min na o tɔgɔ ye ko Antiose. U bɔra yen ka taa Troas, ka tila ka taa Filipe, Tesalonike, ani Bere. I ɲɛ bɛ Atɛnɛ na dugukolo ja kan wa? Paul ye waajuli kɛ o yɔrɔ la. O kɔfɛ, u ye waajuli kɛ san kelen ni tila Kɔrɛnte. U labanna ka u jɔ dɔnnin Efese. O kɔfɛ, u seginna kurun fɛ Sesare, ka tila ka taa Antiose, Paul kelen tora yɔrɔ min na.

Timote ye kilomɛtɛrɛ ba caman kɛ o cogo la walisa ka Paul dɛmɛ ka ‘kibaru duman’ waajuli kɛ, ani ka Krecɛn jɛkulu caman sigi. Ni i kɔrɔbayara tuma min na, yala i bɛna kɛ Ala ka baarakɛden kantigi dɔ ye i ko Timote wa?

Kɛwalew 9:​19-30; 11:​19-26; tilayɔrɔba 13 ka na 17 la; 18:​1-22.

[Map]

Romɛ

Malte

Tesalonike

Bere

Kɔrɛnte

Filipe

Atɛnɛ

Krete

Troas

Efese

Mile

Kolose

Antiose

Ikonɛ

Lisitre

Antiose

Siprɛ

Damasi

Sesare

Jope

Jerusalɛm

KƆGƆJIBA (MÉDITERRANÉE)