SABBINGWA apóstol Pablo walig gwissi be daggedi nuga Timoteo. Timoteo na gwenadgan walig gudii Listragi. E nan nuga Eunice geb e muu nuga Loida.

Wes irbaa gude Pablo Listras addaggedi. Birgagwen gussaale Pablo, Bernabébo gebe sagla unni weg gudigusmarbali, babigargi sunmaggega. Emisgi Pablo na e ai Silasbo gannar nonibali.

¿Be wisi igi Timoteog Pablo soggwissi? Ese egisgwissi: ‘¿Be anmarba nabimoga? Nabir be anmar bendasaled, neggwebur diggasur nanaidgi dulemar bugmaladga babigargi sunmaggega’.

Timoteo soge: ‘Eye, an nabie’. Degsoggu, Timoteo na gwenadgangi bangude, geb Pablo bali geb Silasba nadsunna. Auggine we nadmaladsig anmar durdagged iduale, bin anmar daggoloe igi Pablodi gudigusmodibe. Damasco igarba Pablo, Jesús iddosad aggale, 17 años gussaale.

¡Nue ebinsao, Pablo Damascos noni gusa Jesús sabbingan nagbi saega, auggi emidi e na Jesús sabbinga gusmoga! Beedse gine, e isdarmalad Pablo oburgwebi gusmala, auggi bamalad Jesús sabbingan Pablo bendasmala nabir wagginnega. Garbag neggwebur muro maid dagsiggi odesmala.

Sorba, Pablo nade Antioquíase babigargi sunmaggega. Agine Jesús sabbingan gebe bilenonimala cristianoye. Geb Antioquíag gudimaladgi Pablo, Bernabébo barmilesmala dulemar diggasur bugmaladga babigargi sunmagnamalaga. Neggwebur Listra nugadse addaggabmala, Timoteo aa ginedi.

Emisgi, birgagwen gussaaled gine, Pablo irbogus neggweburse addagdiidgi, gannar Listras nonibali. Geb Timoteo, Pablobo geb Silasbo nadgua, ¿be wisi bia nadmala? Mapa be daggena geb anmar durdaggoe.

Gebe unni nadmala Iconiose, adi iddagga nai, geb sorba nadmala baid neggwebur, Antioquíaye bilebalidse. Sorbali Troas sega nadmala, degine, Filipos, Tesalónica geb Berea. ¿Be dagsa mapag bia Atenas nai? Pablo weg babigargi sunmasa. Aa sorba, birgagwen abala babigargi sunmagdi gusmala Corintogi. Nabbidgi, Éfesog isse gudigusmala. Sorba, sourgi gannar Cesareas nonimala, geb Antioquías nadmala, asega Pablo megnoniggi.

Degsoggu Timoteo yeer bangu obagdii gusa, Pablo bendaggedga Bab “ibmar nuegan” mamaidgi sunmaggega, geb buggidar dulemar urbiali Cristo sordagan gala guega. Be dungusale, ¿Timoteo yobi be Babdummadga nueggwa arbadii gumogoe?