AKPARAWA oro afo okụtde mi ye apostle Paul edi Timothy. Timothy odụn̄ ye ubon esie ke Lysʹtra. Eka esie ekere Euʹnice ndien ekaeka esie, Loʹis.

Ọyọhọ ikata edi emi Paul akade Lysʹtra. N̄kpọ nte isua kiet mbemiso, Paul ye Barʹna·bas ẹma ẹdi mi akpa ini ke isan̄ ukwọrọikọ. Ndien Paul afiak edi ye ufan esie Silas.

Nte ọmọfiọk se Paul ọdọhọde Timothy? ‘Nte akpama ndisan̄a ye ami ye Silas?’ enye obụp. ‘Nnyịn ikpoyom un̄wam fo ke ndikwọrọ ikọ nnọ mme owo ke mme anyan ebiet.’

‘Ih,’ Timothy ọbọrọ, ‘N̄kpama ndika.’ Ntre ibịghike, Timothy ọkpọn̄ ubon esie asan̄a ye Paul ye Silas. Edi mbemiso nnyịn ikpep iban̄a isan̄ mmọ, yak ifiọk se itịbede inọ Paul. Osịm n̄kpọ nte isua 17 tọn̄ọ Jesus okowụt enye idem ke usụn̄ akade Damascus.

Ti, Paul ekedi Damascus ndikọbọ mme mbet Jesus, edi ke emi enye edi mbet ke idemesie! Ekem, usụk mme asua ẹdiomi ndiwot Paul koro mmọ mimaha enye ekpep aban̄a Jesus. Edi mme mbet ẹn̄wam Paul ọbọhọ. Mmọ ẹsịn enye ke akpasa ẹsụk ke an̄wa ibibene obio.

Ekem Paul aka Antioch ndikwọrọ ikọ. Edi mi ke ẹkot mme anditiene Jesus mme Christian ke akpa ini. Ẹdọn̄ ndien Paul ye Barʹna·bas ẹto Antioch ẹka isan̄ ukwọrọikọ ke ata anyan idụt. Kiet ke otu mme obio mmọ ẹkade edi Lysʹtra, obio Timothy.

Ke emi, n̄kpọ nte isua kiet ebede, Paul afiak ke Lysʹtra ke udiana isan̄ esie. Ke Timothy adahade ye Paul ye Silas, nte ọmọfiọk ebiet mmọ ẹkade? Se map oro, yak ikpep ndusụk mme itie oro.

Akpa, mmọ ẹka n̄kpet n̄kpet I·coʹni·um, ekem udiana obio ẹkotde Antioch. Ke oro ebede mmọ ẹsan̄a ẹdọk ẹka Troʹas, ekem ẹsịm Phi·lipʹpi, Thes·sa·lo·niʹca ye Be·roeʹa. Nte omokụt Athens ke map? Paul ọkwọrọ ikọ do. Ke oro ebede mmọ ẹbiat isua kiet ye ubak ẹkwọrọ ikọ ke Corinth. Ke akpatre mmọ ẹbet esịt ke Ephʹe·sus. Ekem mmọ ẹsan̄a ke ubom edi Caes·a·reʹa, ndien ẹsan̄a ẹdọk ẹka Antioch, ebiet Paul odụn̄de.

Ntre Timothy asan̄a ata ediwak itiat ikie an̄wam Paul ndikwọrọ “eti mbụk” ndinyụn̄ ntọn̄ọ ediwak mme esop Christian. Ke afo okponde akan, nte afo eyedi asan̄autom mbuọtidem Abasi nte Timothy?