KO MITÃRUSU rehecháva Pablo ndive héra Timoteo. Timoteo oiko Lístrape ifamília ndive. Isy héra Eunice ha ijavuéla Loida.

Kóva haʼe tercera visíta Pablo ojapóva Lístrape. Ojapo un áño rupi Pablo ha Bernabé ou ypy hague koʼápe opredika. Koʼág̃a Pablo ou jey iñamígo Silas ndive.

Reikuaápa mbaʼe heʼihína Pablo Timotéope? ‘Nderehoséipa Silas ndive ha chendive?’, oporandu chupe. ‘Nde ikatu orepytyvõ japredika hag̃ua umi tapicha mombyryguápe.’

‘Heẽ’, heʼi Timoteo, ‘ahase penendive’. Upe riremi, Timoteo oheja hóga ha oho Pablo ha Silas ndive. Péro ñaaprende mboyve iviáhegui, jahechami mbaʼépa oikóraʼe Páblore. Ojapóma 17 áño Jesús ojehechaukahague chupe Damasco rapére.

Nemanduʼápa, Pablo ouvaʼekue Damáscope ojapo hag̃ua mbaʼe vai Jesús disipulokuérare, péro koʼág̃a oiko avei chugui peteĩ disípulo! Upe rire, umi ndohayhúiva Páblope oñehaʼã ojuka chupe, péro umi disípulo oipytyvõ chupe okañy hag̃ua. Peteĩ ajakápe omboguejy chupe hikuái pe murálla ári rupi, ha upéicha oguenohẽ pe siudágui.

Upe rire, Pablo oho opredika Antioquíape. Koʼápe oñehenói ypy kristiáno Jesús disipulokuérape. Upéi Pablo ha Bernabépe oñemondo peteĩ viáhe pukúpe Antioquía guive, opredika hag̃ua umi tetã mombyryha rupi. Peteĩ siuda og̃uahẽháme hi-kuái héra Listra, oikohápe Timoteo.

Koʼág̃a, ohasa rire un áño rupi, Pablo ojevy Lístrape, pe segundo viáhe ojapóvape. Osẽrõ guare Timoteo, Pablo ha Silas ndive, ndépa reikuaa moõpa oho hikuái? Emañamína pe mápare, ha jaikuaami.

Ñepyrũrã oho hikuái Icóniope, hiʼag̃uíva upégui, ha upéi ohasa pe siuda hérava Antioquíape. Upéi oho hikuái Tróaspe, ha upéi ohasa Filipos, Tesalónica ha Beréape. Rehechápa Atenas pe mápape? Pablo opredika upépe avei. Upe rire opyta hikuái opredika un áño ha seis mése Coríntope. Ipahápe opyta mbykymi hikuái Éfesope. Upégui ojevy várkope Cesaréape, upéi oho Antioquíape, ha upépe opyta Pablo.

Ha upéicha Timoteo oviaha heta kilómetro Pablo ndive ha oipytyvõ chupe opredika hag̃ua umi ‘notísia porã’ ha omoñepyrũ hag̃ua heta kongregasión. Ndetuichave vove, oikónepa avei ndehegui peteĩ siérvo fiél Ñandejárape g̃uarã Timotéoicha?