ANI li saaj al li wank rikʼin li apostol Pablo? Aʼan laj Timoteo. Laj Timoteo ut li xjunkabʼal wankebʼ saʼ li tenamit Listra. Li xnaʼ laj Timoteo aʼan xʼEunice ut li xnaʼchin aʼan xLoida.

Ak kinumeʼk tana jun chihabʼ naq laj Pablo ut laj Bernabe keʼchalk saʼ xbʼeen sut chi xpuktesinkil li chaabʼil esilal saʼ li tenamit Listra. Anaqwan laj Pablo kichalk wiʼ chik Listra rochbʼeen laj Silas.

Laj Pablo kixye re laj Timoteo: ‹Ma twulaq raj chaawu xik chiwix ut chirix laj Silas chi xpuktesinkil li chaabʼil esilal saʼebʼ li najtil tenamit?›

Laj Timoteo kixye: ‹Twaj xik cheerix!› Moqon chik, laj Timoteo kixkanabʼ li xjunkabʼal ut xko chirix laj Pablo ut laj Silas. Xbʼeenwa tqatzol kʼaru kixkʼul chaq laj Pablo. Ak kinumeʼk 17 chihabʼ naq li Jesus kixkʼutbʼesi ribʼ chiru laj Pablo naq yook chi xik Damasco.

Maare jultik aawe naq laj Pablo kixrahobʼtesihebʼ li xtzolom li Jesus. Anaqwan aʼan chik jun rehebʼ li xtzolom li Jesus. Moqon chik, ebʼ li xikʼ nekeʼilok keʼraj xkamsinkil. Joʼkan naq ebʼ li xtzolom li Jesus keʼxtenqʼa laj Pablo chi elelik. Joʼkan naq, keʼxkʼe saʼ jun li chakach ut keʼxkubʼsi chirix li xnubʼaal li tenamit.

Chirix chik aʼan, laj Pablo kiwulak Antioquia chi xpuktesinkil li chaabʼil esilal. Aran Antioquia keʼxtikibʼ xyeebʼal rehebʼ li xtzolom li Jesus, aj paabʼanel. Laj Pablo ut laj Bernabe keʼtaqlaak saʼebʼ li najtil tenamit re xpuktesinkil li chaabʼil esilal. Jun rehebʼ li tenamit bʼarwiʼ keʼwulak wiʼ aʼan Listra saʼ li xtenamit laj Timoteo.

Ak kinumeʼk tana jun chihabʼ naq laj Pablo kitaqlaak saʼ li xkabʼ sut saʼ li tenamit Listra. Aran naq laj Timoteo kixtaqe laj Pablo ut laj Silas. Chaawil saʼ li reetalil li tenamit re naq tqatzol bʼar kohebʼ.

Xbʼeenwa kohebʼ saʼ li tenamit Iconio. Chirix chik aʼan, kohebʼ saʼ li tenamit Antioquia. Tojaʼ naq kohebʼ saʼ li tenamit Troas. Moqon chik kohebʼ Filipos, Tesalonica ut Berea. Ma nakaawil bʼar nakanaak li tenamit Atenas? Aran kiwulak laj Pablo chi xpuktesinkil li chaabʼil esilal. Chirix chik aʼan, keʼxpuktesi li chaabʼil esilal saʼ li tenamit Corinto chiru jun chihabʼ rikʼin waqibʼ po. Moko najt ta keʼwank saʼ li tenamit Efeso. Tojaʼ naq, keʼsutqʼiik saʼ jun li jukubʼ saʼ li tenamit Cesarea ut kohebʼ Antioquia, bʼarwiʼ kikanaak laj Pablo.

Saʼ naabʼal chi naʼaj kiwulak laj Timoteo ut laj Pablo chi xpuktesinkil li chaabʼil esilal ut naabʼal li chʼuut keʼxaqabʼ. Naq tatnimanq, ma tatkʼanjelaq chiru li Yos joʼ kixbʼaanu laj Timoteo?