AWE wakyanyike ye ubena kumona pa kikye kipikichala uji ne mutumwa Paulo ye Timoti. Timoti waikalanga pamo na kisemi kyanji mu Lisitila. Bainanji jizhina jabo bajinga ba Yunisa, ne bankambo yanji ba bakazhi bajinga ba Loisa.

Kino kyajinga kimye kya busatu Paulo kyo ayile ku Lisitila. Byo papichile mwaka umo, Paulo ne Banabasa baishile kuno konka ku Lisitila na kusapwila. Pano Paulo wabweleleko jibiji pamo ne mukwabo Silasa.

Nanchi wayuka Paulo byo abena kwamba kwi Timoti nyi? Ubena kumwipuzha’mba: ‘Kana wakonsha kutemwa kwendela pamo ne Silasa ne amiwa nyi? Twauba namba tusapwilenga pamo ku bantu baikela mu mapunzha mwalepa.’

Timoti wakumbwile’mba: ‘Ee, nakeba kuya nenu.’ Ponkapo Timoti washile kisemi kyanji ne kuya na Paulo ne Silasa. Bino saka tukyangye kwamba pa lwendo lwabo, twaya patanshi tumone kyamumwekejile Paulo. Papichile myaka 17 kufuma kimye Yesu kyo amwekele kwi aye pa lwendo lwanji lwa kuya ku Damasakasa.

Vuluka kuba’mba, Paulo wayile ku Damasakasa na kumanyika baana ba bwanga ba kwa Yesu, pano aye yenka waikele ke mwana wa bwanga! Palutwe kacheche, balwanyi bapingile bipingo bya kumwipaya Paulo mambo kechi batemenwe byo afunjishenga pe Yesu ne. Bino baana ba bwanga bamukwashishe Paulo kunyema. Bamupishishe pa nsakwa, kasa bamwikizha bichebiche mu kyabo nangwa’mba mu musansa.

Panyuma ya bino, Paulo wayile ku Antioka na kusapwila. Akuno ko ku mpunzha ko batelelwe kimye kitanshi baana ba bwanga ba kwa Yesu amba bena Kilishitu. Paulo ne Banabasa bebatumine kufuma mu Antioka kuya na kusapwila mu byalo bikwabo. Muzhi umo mo bayile wajinga Lisitila, mo mwaikalanga Timoti.

Byo papichile mwaka umo, Paulo wayile jibiji ku Lisitila pa lwendo lwanji lwa bubiji. Timoti byo aendejile pamo na Paulo ne Silasa, wayuka ko bayile nyi? Akimona pa mapu, kabiji twaya tufundepo mapunzha amo.

Patanshi, bayile kwipi na ku Ikonyuma, kepo bafikile ne ku muzhi utelwa’mba Antioka. Byo bafumine ku ino mizhi bayile ku Toloasa, ku Filipai, ku Tesalonika ne ku Beliya. Abya wamumona muzhi wa Atene pa mapu nyi? Ko ko asapwijile Paulo. Panyuma ya bino, bapwishishe mwaka umo ne kichika na kusapwila mu Kolinda. Kyapeleleko, baikeleko mu Efisesa. Kepo babwelele ku Kesalea, ne ku Antioka ko aikelenga Paulo.

Timoti waendelenga miseke yalepa bingi na kukwasha Paulo kusapwila “mambo awama” ne kutendekesha bipwilo byavula bingi bya bwina Kilishitu. Ne obewa inge wakoma, abya ukekala kalume wa Lesa byonka byajinga Timoti nyi?