UMUSANKWA ulukubona apa uuli ne ntangisi Paulu ni Timote. Timote alekala ne lupwa lwakwe mu Lustala. Banyina ni ba Yunike na bambuya wakwe ni ba Loisi.

Uyu e muku wa butatu Paulu afakasya ku Lustala. Cipale papita umo’mwaka neli ukucilapo, Paulu na Banaba balisile kuno umuku wa kutanga pa lwendo lwa kutulisya. Lomba pano Paulu abwela nakabili ne mubyakwe Sailasi.

Mba waisiba ifi Paulu alukulabila kuli Timote? Alukwipusya ati: ‘Kani ungatemwa ukuba pamo na nebo na Sailasi? Tungapyungisya ukofwa kobe ukutulisya ku bantu mu mipunda iya kutali.’

Timote aasuka ati: ‘Inya. Ndukufwayo’kuya.’ Popele pakupite’mpindi inini Timote asya ulupwa lwakwe kabili aya na Paulu na Sailasi. Pano ili tatungasambilila pa lwendo lwabo, leka tubone ifyalukucitika kuli Paulu. Cipale papite’myaka 17 ili baYesu babonekele kuli ye pa musebo wa ku Damasiko.

Anuka ukweba’ti, Paulu aalisile ku Damasiko mu kusomesya abasambile ba baYesu, lomba pano ye musambile! Panuma bamo bamo abapate baansika ati bepaye Paulu nipakuti balipatile ifi asambisya pali baYesu. Pano abasambile baofwa Paulu ukufyuka. Bamubika mu citundu ne kumuselusisya pansi posonde ye linga lya musi.

Panuma Paulu aya ku Antioke mu kutulisya. Ni kukuno uku abasambile ba baYesu mu kutanga baitwa ati abaKlistu. Paulu na Banaba pano eli batumwa ukufuma mu Antioke pa lwendo lwa kutulisya ku fyalo fya kutali. Umo umusi bafakasyako ni Lustala, kwabo Timote.

Pano, pakupita cipale umwaka umo, Paulu abwela ku Lustala pa lwendo lwa bubili. Ili Timote aya na Paulu na Sailasi, kani waisiba uku baya? Lolesya pali mapu, kabili leka tusambilile imo imo imipunda.

Pa kutanga, baya ku musi wapepi uwa Ikonya, eli ku musi wa bubili uwe sina lya Antioke. Panuma yafyefyo baya ku Tilowa, eli ku Filipoi, Tesalonike na ku Beloya. Kani waibona Atenai pali mapu? Paulu atulisyako kulya. Pakupite’fi basila umwaka umo ili batulisya mu Kolinto. Mukupelako baimakanako panini mu Efesa. Eli babwela ne bwato ku Kaisalia, kabili baya ku Antioke, ukwikala Paulu.

Popele Timote aenda imyanda ne myanda iya mamailosi ukofwa Paulu ukutulisya ‘icebo iciweme’ kabili ne kutatika amakelesya abuKlistu aengi. Ili ukakula, kani nawebo ukaba umupyungisi wa bucetekelo uwa baLesa koti ni Timote?

Ifyacitilwe 9:19-30; 11:19-26; ifyapitala 13 ukufika ku 17; 18:1-22.

1. Loma; 2. Melita; 3. Beloya; 4. Tesalonike; 5. Kolinto; 6. Filipoi; 7. Antenai; 8. Cilete; 9. Tilowa; 10. Efesa; 11. Mileto; 12. Kolosai; 13. Antioke; 14. Ikonya; 15. Lustala; 16. Kupilo; 17. Antioke; 18. Kaisalia; 19. Jopa; 20. Damasiko; 21. Jelusalemi; 22. Icishiba Icikulu (Mediterranean)