MPANJI 110

Timotewu—Nkwashi Yapawulu Wamuha

MUKWENZI weyala yiwunakumona hanu nakapostolu Pawulu diyi Timotewu. Timotewu washakamaña nachisaka chindi muLisitira. Mama yindi ijina dindi diyi Yunisi hakwila nkaaka yindi diyi Lowisi.

Aka dikapampa kamuchisatu kanendeliyi Pawulu muLisitira. Kwakwihi nachaaka chimu hela kubadikahu hanyima, Pawulu naBaranaba enjili katachi kweniku halwendu lwakushimwina. Dichi Pawulu nafunti cheñi kuLisitira nebwambu dindi Silasi.

Wuneluki chinakumulejawu Timotewu kudi Pawulu? Nakumwihula nindi, ‘Wukukeña kuya nanami niSilasi? Tunakukeña wutukwashiku kushimwina kudi antu akumatuña akwakulehi.’

Timotewu hakwakula nindi, ‘Eña, nakukeña kuya.’ Nkumininaku, Timotewu hakushiya chisaka chindi nakuya naPawulu niSilasi. Ilaña henohu kanda tudizi halwendu lwawuku, tutalenu ntahi jadiña nakumumwekena Pawulu. Munahiti dehi yaaka 17 kufuma hamumwekeneniyi Yesu hanjila yakuya kuDamakasa.

Anukaku, Pawulu wenjili kuDamakasa nakukabisha atumbanji twaYesu, ilaña ichi yena nekali dehi hikambanji! Chimunahiti mafuku ayilumbu hiyakukeña kumujaha Pawulu muloña hiyakeña ntañishilu yindi hadi Yesuku. Ilaña atumbanji hiyakumukwasha Pawulu kutemuka. Hiyakumusha muchimpaya nakumuzenzumwina hanzi yampwembu yamusumba.

Nkumininaku Pawulu hakuya kuAntiyoki nakushimwina. Kweniku dikwatachikiliwu kuyitena atumbanji twaYesu nawu eniKristu. Pawulu naBaranaba hiyakuyitemesha kufuma kuAntiyoki nakuya halwendu lwakushimwina kumatuña akwakulehi. Musumba wumu hadi nyisumba yinahempuliwu hiLisitira, kumukala wawaTimotewu.

Henohu chaaka kanda chishikili, Pawulu hakufunta kuLisitira halwendu lwamuchiyedi. Chelili Timotewu naPawulu niSilasi ananyamuki dehi, wuneluki kwayiliwu? Talaku hamapu kulonda twiluki maluña amakwawu.

Tachi hiyakuya kukamwihi kuIkoniyumu, hiyakuya cheñi kumusumba wamuchiyedi waAntiyoki. Hanyima yanichi hiyakuya kuTirowasi, kufumaku hiyakuya kuFwilipi, nikuTesalonika niBereya. Wunawumoni musumba waAtenisi hamapu? Pawulu hakushimwina mwenamuna. Kufuma kuna hiyakumanisha chaaka chamukuma nichikunku nakushimwina muKorinda. Nkumininaku hiyakwimana chantesha muEfwesesa. Kufumahu hiyakufunta nawatu kuKesareya, nakuya kuAntiyoki kuna kwashakaminiyi Pawulu.

Dichi Timotewu hakwenda makulakaji namakulakaji amakilomita nakumukwasha Pawulu kushimwina “nsañu yayiwahi” nikutachika yipompelu yayivulu yaweniKristu. Neyi wunakuli dehi, aneyi wukekala kambuña Nzambi wachikuhwelelu neyi Timotewu?

Yililu 9:19-30; 11:19-26; kapetulu 13 nakushika ku 17; 18:1-22.

[Mapu]

(Neyi munakukeña kumona ntanjikilu yejima talenu mumukanda)

Roma

Melita

Tesalonika

Bereya

Korinda

Fwilipi

Atenisi

Kereta

Tirowasi

Efwesesa

Miletusa

Kolose

Antiyoki

Ikoniyumu

Lisitira

Antiyoki

Kipirosi

Damakasa

Kesareya

Yopa

Yerusalema

KALUÑALWIJI MUNENI (MEDITERRANEAN)