MANE-KLOSAN neʼebé ó haree iha neʼe hamutuk Paulo mak Timóteo. Timóteo hela hamutuk ho ninia família iha Listra. Ninia inan naran Eunice, no avó-feto naran Lóide.

Ida-neʼe mak Paulo nia vizita ba dala tolu iha Listra. Maizumenus tinan ida antes neʼe, Paulo no Barnabé mai iha neʼe ba dala primeiru iha sira-nia viajen atu haklaken. Agora, Paulo fila fali mai iha neʼe hamutuk ho ninia kolega Silas.

Hatene saida mak Paulo hatete daudauk ba Timóteo? Nia husu: ‘Ó hakarak bá hamutuk ho Silas no haʼu ka lae? Ó bele ajuda ami atu haklaken ba ema iha rai dook tebes.’

Timóteo hatán: ‘Hakarak, haʼu hakarak bá.’ Lakleur, Timóteo husik ninia família no tuir Paulo no Silas. Maibé, antes ita aprende kona-ba sira-nia viajen, mai ita haree uluk saida mak akontese ba Paulo. Maizumenus tinan 17 liu tiha husi tempu neʼebé Jesus mosu ba nia iha dalan atu bá Damasku.

Hanoin-hetan, Paulo mai toʼo Damasku atu fó-terus ba Jesus nia dixípulu sira, maibé agora nia rasik mak dixípulu ida! Tuirmai, inimigu balu halo planu atu oho Paulo tanba sira la gosta nia kuandu nia hanorin kona-ba Jesus. Maibé, dixípulu sira ajuda Paulo atu halai. Sira hatama nia iha raga, no hatún nia ba liʼur husi moru sidade nian.

Depois neʼe, Paulo bá Antiokia atu haklaken. Iha fatin neʼe mak Jesus nia dixípulu sira simu naran Kristaun ba dala primeiru. Hafoin, Paulo no Barnabé simu knaar atu husik Antiokia no bá rai dook tebes. Sidade ida neʼebé sira vizita mak Listra, Timóteo nia rai.

Agora, maizumenus tinan ida liu tiha. Paulo mai fali Listra iha viajen segundu. Bainhira Timóteo bá tuir Paulo no Silas, ó hatene sira bá neʼebé? Haree toʼok ba mapa neʼe, no mai ita aprende rai balu.

Ulukliu, sira bá toʼo sidade besik naran Ikóniu, no tuirmai, sidade ida seluk neʼebé mós iha naran Antiokia. Depois neʼe, sira laʼo toʼo Tróade, no hakat ba Filipe, Tesalónika, no Beréia. Ó haree Atenas iha mapa ka lae? Paulo haklaken iha neʼebá. Depois neʼe, sira haklaken iha Korintu tinan ida ho balun. Tuirmai, sira para uitoan iha Éfezu. No ikusmai, sira saʼe ró hodi bá toʼo Sezareia, no fila fali ba Antiokia, no Paulo hela iha sidade neʼe.

Nuneʼe, Timóteo laʼo rai dook kilómetru atus ba atus hodi ajuda Paulo atu haklaken ‘lia-foun diʼak’ no harii kongregasaun Kristaun barak. Kuandu ó sai boot, ó mós hakarak atu sai Maromak nia atan neʼebé laran-metin hanesan Timóteo ka lae?