TE JCHʼIEL kerem te ya awil sok te jpuk kʼop Pabloe, Timoteo sbiil. Te Timoteo ay ta nainel ta Listra sok te jayeb machʼatik ay yuʼune. Eunice sbiil te smeʼe, Loida sbiil te syameʼe, o te schuchuʼe.

Yoxebalix buelta yulaʼtaybel-a te Listra te Pabloe. Ayniwanix jun jaʼbil te kʼotik tey ta sbabial buelta te Pablo sok te Bernabé ta xcholel te skʼop Diose. Ta patil chaʼsujt tey-a te Pablo sok te Silas te yamigoe.

¿Yabal anaʼ te bin la yichʼ albeyel te Timoteo yuʼun te Pabloe? Jich la sjojkʼoy te Pabloe: ¿Yabal akʼan ya ajokinonkotik bael sok te Silase? Ya xjuʼ ya akoltayonkotik ta xcholbeyel skʼop Dios te ants winiketik te namal ay slumalike.

Jich la yal te Timoteoe: Yak, ya jkʼan ya jokinex bael. Tey-abi ma jalaj te la yijkʼitay jilel te machʼatik ay yuʼune jich bajtʼ sok te Pablo sok te Silase. Jaʼukmeto nail ya kiltik te bin yak ta kʼoel ta stojol-a te Pabloe, ta patil yame jnoptik te banti beenike. Ay kʼaxemix juklajuneb jaʼbil te kʼalal chiknaj te Jesús ta stojol te Pablo ta sbelal Damasco.

¡Julukme ta awoʼtan te tal ta Damasco te Pablo ta yutsʼinel te jnopojeletik yuʼun te Jesuse, jaʼukmeto ta yorail-abi jnopojelix euk-a! Ta patil ay chaʼoxtul jkontrainwanejetik te la sleik te Pablo yuʼun kʼan smilik, jaʼukmeto koltayot lokʼel ta anel yuʼun te jnopojeletike. La sjijpanik koel ta moch ta spat stsʼajkʼul te lume, jich la skoltayik-abi.

Ta patil, te Pablo kʼax ta Antioquía ta xcholel skʼop Dios. Jaʼ te banti nail akʼbot sbiilinik cristianoetik te jnopojeletike. Kʼalalto ta Antioquía la yichʼik tikunel bael te Pablo sok te Bernabé ta xcholel skʼop Dios ta yanyantik nacionetik te namal ayike. Te chaʼoxpam lumetik te la yulaʼtayike, jaʼ te Listra te banti ay ta nainel-a te Timoteoe.

Ayniwan jun jaʼbil ta patil kʼalal te Pablo bajtʼ ta xchebal buelta tey ta Listrae. Kʼalal te Timoteo bajtʼ sok te Pablo soknix te Silase, ¿yabal anaʼ banti bajtʼik? Ilawil te mapae, sok akʼa jnoptik.

Nail bajtʼik ta Iconio te nopol aye, tey-abi bajtʼik ta banti te yan lum te jaʼnix jich Antioquía sbiile. Ta patil bajtʼik ta Troas, tey-abi bajtʼik ta Filipos, sok Tesalónica soknix ta Berea. ¿Yabal ata ta ilel ta mapa te banti ay te Atenase? Tey la schol skʼop Dios te Pabloe. Ta patil la scholik skʼop Dios jun jaʼbil sok olil ta Corinto. Tey-abi jilik cheʼoxebuk kʼajkʼal ta Éfeso. Ta patil sujtik bael ta barco ta Cesarea, jich moik bael ta Antioquía, te banti jil te Pabloe.

Jich te Timoteo kʼaxto namal te banti been ta skoltayel te Pablo ta xcholel te lek yachʼil kʼope, sok jich la sjachik bayal congregacionetik. Te kʼalal ya xmukʼubate, ¿junbal awoʼtan ya x-ayinat ta stojol Dios jich bitʼil te Timoteoe?