LI KEREM te xchiʼuk jtakbol Pablo cha vile jaʼ Timoteo. Li Timoteoe te nakal ta Listra xchiʼuk yutsʼ yalal. Li smeʼe jaʼ sbi Eunice, li syayae jaʼ sbi Loida.

Liʼe yoxibal xa velta tal li Pablo ta Listrae. Lokʼ xa jun jabil ti ay xchol mantal xchiʼuk Bernabé ta sba velta liʼe. Tana ne li Pabloe tal noxtok ta Listra, la xchiʼin tal jun yamigo ti jaʼ sbi Silase.

¿Mi xa naʼ kʼusi ch-albat yuʼun Pablo li Timoteoe? ¿Mi cha kʼan chbat achiʼinunkutik ta chol mantal xchiʼuk Silas?, xi la sjakʼ li Pabloe. Xuʼ cha koltaunkutik ta xcholbel mantal li krixchanoetik ta namal lumetike, xi.

Tana, chi bat, xi li Timoteoe. Jaʼ yuʼun mu ta sjaliluk la jyikta yutsʼ yalal li Timoteoe, bat xchiʼin Pablo xchiʼuk Silas. Pe kʼalal mu to ta jchanbetik skʼoplal ti butikuk xanave, jkʼeltikik baʼyel li kʼusi kʼotem ta pasel ta stojolal li Pabloe. Lokʼ xa vuklajuneb jabil ti la jyakʼ sba ta ilel Jesús ta stojolal Pablo te ta sbelel Damascoe.

¡Vuleso ta ajol, li Pabloe tal ta Damasco sventa chakʼbe svokol yajchankʼoptak Jesús, pe tanae jaʼ xa yajchankʼop Jesús ek! Ta mas tsʼakal oy jayvoʼ jkontrainvanejetik ta saʼik li Pabloe, yuʼun tskʼan ta smilik, pe li yajchankʼoptak Jesuse la skoltaik sventa chjatav batel. La xchechik yalel ta jun moch ta smuroal li jteklume, vaʼun jech la slokʼesik batel.

Laj ne, li Pabloe echʼ batel ta Antioquía sventa ta xchol skʼop Dios. Liʼe jaʼ ti bu ta sba velta la jyichʼik biiltasel yajtsʼaklom Jesús li jchankʼopetike. Ta mas tsʼakal, li Pablo xchiʼuk Bernabee la jyichʼik takel batel ta chol mantal, likik batel ta Antioquía kʼalal to ta namal lumetik. Jun lum ti bu la xchol mantal li Pabloe jaʼ sbi Listra ti bu nakal li Timoteoe.

Ta jun jabil mas tsʼakal, li Pabloe tal ta Listra, liʼe jaʼ xa xchibal velta. Kʼalaluk lokʼ batel li Timoteo xchiʼuk Pablo xchiʼuk Silase, ¿mi xa naʼ bu batik? Jkʼeltikik, kʼelavil li mapae.

Baʼyel batik ta Iconio ti nopol noʼoxe, vaʼun batik ta xchibal lum ti jaʼ sbi Antioquiae. Laj ne batik ta Troas, te echʼik batel ta Filipos, ta Tesalónica xchiʼuk ta Berea. ¿Mi xa vil li Atenas te ta mapae? Te la xchol mantal li Pabloe. Jech noxtok, te echʼ jun jabil xchiʼuk oʼlol ta xcholel mantal ta Corinto. Laj ne, te pajik jayibuk kʼakʼal ta Éfeso. Vaʼun sutik tal ta varko kʼalal to ta Cesarea, muyik batel ta Antioquía jaʼ xa ti bu kom li Pabloe.

Jech, li Timoteoe toj nom tajek xanav ta skoltael Pablo ta xcholel li «Lequil Aʼyeje» xchiʼuk ta slikesel epal tsobobbailetik. Kʼalal mi la chʼie ¿mi jech tukʼil jtunelot cha kʼot ta stojolal Dios kʼuchaʼal li Timoteoe?